Кабар жана жарыялар

«Түрк жана Кыргыз тилдерин аралыктан окутуу» порталы ачылды

Үстүбүздѳгү жылдын 10-апрелинде  Кыргыз-Түрк  «Манас» университетинде «Кыргыз жана Түрк тилдерин Аралыктан окутуу программасынын»  ачылыш аземи  болуп ѳттү. Иш-чарага окуу жайдын жетекчилиги, факультеттин мүдүрлѳрү, Мамлекеттик тил боюнча Улуттук комиссиянын ѳкүлдѳрү, БГУнун окутуучулары жана Чет тилдер жогорку мектебинин окутуучулар жана студенттер жамааты катышты.

Анда деңгээлдер боюнча даярдалган «Алтын кѳпүрѳ» окуу топтомдорун порталга коюунун жүрүшү жана келечеги талкууланды. Иш-чарага КТМУнун  ректору, проф. Себахаттин Балжы, биринчи проректору, проф. Асылбек Кулмырзаев жана КРнын Президентине караштуу Мамлекеттик тил боюнча Улуттук комиссиянын тѳрагасы, проф. Н.Ишекеев катышып, сѳз сүйлѳштү.

Ректор, професср Себахаттин Балжы учурда дүйнѳдѳ тилдердин жашап калуу же ѳлүп жок болуу күрѳшү жүрүп жатканда жалпы эле Түрк тилдерин мындай ыкчам ыргак менен техникага салып үйрѳтүү кызматтары абдан керектигин жана пайдалуу болорун  баса белгиледи. Биринчи проректор, профессор А.Кулмырзаев мындан 20-30 жыл мурда Кыргыз тили мамлекеттик статус алып, алгач окутуп-үйрѳтүү иштери башталган мезгилде кѳптѳгѳн кыйынчылыктар, методикалык жетишсиздиктер болуп келгендигин белгилеп, учурдагы ийгиликтер  мамлекеттик тилди окуп үйрѳнүүнү тездете турган баалуу методикалык ѳбѳлгѳ экендигине токтолду. Профессор Н.Ишекеев азыркы тилдердин жашоого болгон атаандашуусу жана  техникалык доордо  санариптештирүү жана жасалма интеллектуал жараяндары улам турмушубузду каптап келе жаткан шартта ошол процесстерге жандуу аралашып, түрк тилдерин тез жана жеңил үйрѳнүүнүн шарттары менен мүмкүнчүлүктѳрүн колго алып, алгачкылардан болуп ишке ашырып жаткан окуу жайдын жетекчилигине жана Чет тилдер жогорку мектебинин жамаатына ыраазычылык билдирди. Кыргыз жана Түрк  тилдеринде даярдалган  «Алтын кѳпүрѳ» окуу топтомдорун  Порталга даярдоонун жана  коюунун  башкы жетекчиси, ага окутуучу  Мүхиттин Гүмүш ѳз сѳзүндѳ бул порталдын ачылышынын мааниси, аны техникалык жактан даярдоо жана монтаждоо, дизайн иштери, келечеги жана тил үйрѳтүү багытындагы жаңычылдыктары тууралуу сѳз кылып: «Аралыктан окутууда тил үйрөнүүчүлѳр атайын курска жазылып, убактысын кетирип, тил үйрөтүү дарсканаларына келип отурбастан эле компьютердин башында отуруп, өз алдынча тил үйрөнүү мүмкүнчүлүгүнө ээ болорун белгилеп, тил үйрөнүүнүн мындай жолу санарип жана заманбап техникалар аркылуу ишке ашарын,  аралыктан окутуу сабактары жандуу, аудио жана видео формасында даярдалганын, Тил үйрөнүүнү каалаган учурда, каалаган жерде жана каалашынча сабактарды кайра-кайра көрүп, маалымат алуу менен бирге тилдерди  тез жана оңой үйрөнүү мүмкүнчүлүгүнѳ ээ болорун  баяндады.  Чет тилдер жогорку мектебинин мүдүрү, ф. и. к, доцент, Т.Абдиев чыгып сүйлѳп, ушул иштердин багыттамачысы болуп, бардык шартты түзүп берип жана ар тараптан колдоп келген окуу жайдын ректору баштаган жетекчиликке, ишке ашырып жаткан окутуучулар жана техникалык кызматкерлер  жамаатына  ыраазычылык билдирип, булар билим берүүдѳ рационалдуу, заманбап методикалык жаңычылдыктар экендигин  билдирди.

Аралыктан окутуу иштерин сайтка коюп жатышкан Чет тилдер жогорку мектебинин окутуучулары  Ахмед   Бугра Инал, Кыял Токтоналиева жана Венера Туратбек кызы порталды иштетүүнүн  жана пайдалануунун жолдорун, сабактардын жайгаштырылышын, ѳзүн ѳзү текшерип жана баалоочу тесттердин коюлушун ж.б. кѳрсѳтүп беришти. Жетекчиликке «Аралыктан окутуу порталына» кирүүнүн сыр сѳздѳрү катылган конверттер тапшырылды.

Иш-чара жандуу маектешүү жана эстеликке сүрѳткө түшүү менен аяктады.

MEDIA MANAS