Кабар жана жарыялар

“Түрк элдеринин жомоктору” жарык кѳрдү

 “Түрк элдеринин жомоктору” аттуу китеп жарык кѳрдү.

2019-жылдын 28-ноябрында Кыргыз-Түрк «Манас» университетинде Түрк цивилизациясын изилдөө борбору тарабынан даярдалган “Түрк элдеринин жомоктору”,  “Türk Dünyası Masalları” аттуу китептин бет ачар аземи болуп өттү.  

Китепке байыркы замандан бүгүнкү күнгө чейин ооздон-оозго, муундан-муунга өтүп келе жаткан боордош түрк элдеринин (анатолиялык түрк, кыргыз, казак, өзбек, азербайжан, түркмөн, алтай, хакас, уйгур, татар) жомокторунун арасынан кызыктуу, тарбия берүүчү сапатка ээ болгон  жомоктор киргизилди. Ошондой эле китеп заманбап түрдө жасалгаланып, жомокторго кооз иллюстрациялар берилди. Аталган эмгек өспүрүм балдарга, мектеп окуучуларына , китеп сүйүүчүлөргө арналып , түрк дүйнөсүнө зор салым кошо турган жыйнак болот деген ишеним менен даярдалды.

Китеп КТМУнун Басмакана бѳлүмүнѳн 1000 нускада кыргыз жана түрк тилдеринде басылып чыкты. Китептин түзүүчүлѳрү: Гүлмира Мамбеталиева, Женгиз Буяр, Максат Ажыкан уулу, Нурсултан Абдимиталип уулу (түзүүчүлөр), Сатыбалды Көчөрбай уулу (дизайн), Айтбүбү Бадахшанова (сүрөтчү), Гүлзада Станалиева, Жемил Шимшек, Керим Тузжу (редактор), Калия Кулалиева (рецензия) болушту. 

Китептин бет ачар аземинде университетибиздин ректору, профессор Себахаттин Балжы жана биринчи проректор, профессор Асылбек Кулмырзаев, КРнын Билим берүү министрлигинин Мамлекеттик тил департаментинин башчысы Гульнара Ибраимовага сөз берилди.

Университеттин биринчи проректору, профессор Асылбек Кулмырзаев ѳз сѳзүндѳ жомоктордун  таалим-тарбиялык мааниси зор экенин баса белгиледи: “Ар бир адамдын бала чагы жомоктор менен байланышкан. Баарыбызга белгилүү болгондой, дал жомок баланы курчап турган дүйнө менен тааныштыра баштайт. Жомок дүйнөсүнө жуурулушкан балдардын ой чабыты мыкты жана элестетүүсү алда канча өнүккөн, алар мээримдүү болуп калат. Жомоктор жаман менен жакшыны, күчтүү менен алсызды ажырата билүүгө үйрөтөт жана адептик дөөлөттөрдү калыптандыруу учурунда алгачкы түшүнүктөрдү берет. Жыйнакка мазмундуулу жагынан түрк элдеринин 30 эл жомоктору тандалып киргизилди. Аталган эмгек өспүрүм балдарга, мектеп окуучуларына, китеп сүйүүчүлөргө арналып, түрк дүйнөсүнө зор салым кошо турган жыйнак болот деген ишеним менен даярдалды”.

Окуу жайдын ректору, профессор Себахаттин Балжы китептин баалуулугун белгилеп: “Жомоктор балдарга таалим-тарбия берип, дүйнѳ таануусун ѳстүрѳт. Балдарыбыздын ар тараптан эркин инсан болуп жетилишине жомоктордун мааниси жана таасири абдан чоң. Түрк элдеринин дини, тили, каада-салты эле эмес, жомоктору да мазмуну жагынан окшош келет. Бул биздин биринчи кадамыбыз. Мындан ары да мындай өңүттөгү иш-чаралар уланат. Китептин түзүүчүлѳрүнѳ терең ыраазычылык билдирем”, - деди.

КРнын Билим Берүү министрлигинин Мамлекеттик тил департаментинин башчысы Гульнара Ибраимова китептин сапаты менен техникасына оң баа берип, ыраазычылыгын билдирди.

“Учурда мамлекеттик тилдин 30 жылдыгына карата ϴкмөттүн иш планында “Бөбөк сенин жомогун” деген республикалык деңгээлде сынак өтүп жатат. Сынактын негизги максаты аталардын балдарына көбүрөөк көңүл буруусу, себеби апалар балдары менен кѳбүрѳѳк алектенет. Аталган сынак КТРКда өтүп жатат. Бул китепти дал ошол сынакта балдарга тапшырып койсоңуздар болот. Китептин сырткы көрүнүшү сүрөттөрү мазмуну менен дал келип, сабаттуу жазылып, сабаттуу жасалгаланган экен. Учурда сабатсыз жазылган жомок китептер жок эмес. Сиздер балдардын астында жоопкерчиликти жогору сезгениңиздер үчүн ыраазычылык билдирем”. 

Иш-чарада ректораттын фойесинде жомоктор үчүн тартылган иллюстрациянын көргөзмөсү уюштурулду.

Медиа Манас