Кабар жана жарыялар

КОРОНАВИРУС ИНФЕКЦИЯСЫ

 

Коронаровирус : курч жугуштуу вирустук оору. Көбүнчө дем алуу органдары жабыркайт.

Козгогучу : РНКлуу  вирус. Betacoronavirus уруусуна Coronaviridae тукумуна кирет.

Жаратылыштагы резервуары: Белгисиз,  жапайы жаныбарлар болушу мүмкүн (жарганат, жапайы иттер ж.б).

Инфекция булактары (кимден жугат?) : жаныбарлар жана оорулуу адамдар.

Жугуу жолдору: аба аркылуу жугат (оорулуу адам жөтөлгөндө, чүчкүргөндө, сүйлөшкөндө вирусту абага бөлүп чыгарат), чаң аркылуу, кол алышканда.

Жугуу факторлору: Аба, тамак аш азыктары (жашылча-жемиш, эт), үй-тиричилик буюмдары.

Инкубациялык мезгили ( жуккандан оорунун башталышына чейинки жашыруун мезгил): 2 суткадан 14 суткага чейин, көбүнчө 2-7 сутка

Дарылоо: патогенетикалык, симптоматикалык, (башкача айтканда вирусту өлтүрө турган даары жок)

Вирус баардык эле адамга жугушу мүмкүн,  50 жаштан улуу жана өнөкөт ооруулары бар адамдарда оору оор түрдө болот.

Дүйнө жүзүндө  лабораторияда жаңы 2019-nCoV коронавирусу такталган 1438 оорулуу катталган (98%-Кытайда). 42 адам каза болгон (2,9%).

Оорунун белгилери:   - дененин табынын көтөрүлүшү (90% көп оорулууда),

                                   - кургак жөтөл,

                                   - дем алуунун кысылуусу,

                                   - көкүрөктө ооруу

Дартты аныктоо : Эгерде

- Оорунун белгилери пайда болгондон 14 күн мурун Кытай  Эл Республикасына барса же ал жерде жашаса

- 2019-nCoV коронавирусу такталган оорулуу менен контакта болсо,

- 2019-nCoV коронавирусу такталган  оорулуу болгон  ооруканада иштесе же ошондой ооруканага барган болсо коронаровирус ооруусу менен оорушу  мүмкүн.

Алдын алуу:

  • Колду самындап бат-бат жууп туруу же спирт менен сүртүү;
  • Жөтөлгөндө же чүчкүргөндө оозду, мурунду чыканак менен же бир жолу колдонулуучу кагаз бет аарчы менен жабуу;
  • Сасык тумоо же курч респиратордук инфекциялардын белгилери байкалган адамдардан алыс болуу;
  • Эт жана жумурканы жакшылап бышырып колдонуу;
  • Жаратылыштагы жапайы жаныбарларга жана канаттууларга жакындабагыла;
  • Эгерде дене табыңыз көтөрүлүп, жөтөлүп, дем алууңуз кыйындаса, тезинен медициналык жардам алууга кайрылыӊыз.
  • Коомдук жайларда медициналык маска тагынып жүрүү.

Азыркы мезгилде коронавируска каршы эмдөө жок.

 

СТУДЕНТТИК ЖАТАКАНА БАШКАРМАЛЫГЫНДАН КУЛАКТАНДЫРУУ!!!

2020-2021 ОКУУ ЖЫЛЫ СТУДЕНТТИК ЖАТАКАНА ҮЧҮН КАЙРЫЛУУЛАР (АРЫЗДАР)

18.05.202015.06. 2020  КҮНДӨРҮ  КАБЫЛ АЛЫНАТ.

СТУДЕНТТЕРДИН КАЙРЫЛУУ АРЫЗДАРЫ  ИНТЕРНЕТ АРКЫЛУУ obis.manas.edu.kg

  ЭЛЕКТРОНДУК АДРЕСИ АРКЫЛУУ  ЖҮРГҮЗҮЛӨТ.

СТУДЕНТТИН ogrnot.manas.edu.kg САЙТЫНДА КОЛДОНГОН КОДУ АРКЫЛУУ КИРЕ АЛАТ.

Тиркеме:

  1. Студенттик жатаканада жашоо үчүн алгач кайрылуу арыз жазуу керек. Кайрылуу арызы жок студенттер  жатаканада жашоо үчүн кабыл алынбайт.
  2. Кайрылуу арызында үй-бүлөлүк абалды, университетте окуган бир туугандарынын санын жана башка балл берилүүчү жагдайлар белгиленген болсо, жатаканага  катталууда  ал    жагдайларды  тастыктоочу документтердин тиркелүүсү зарыл, тастыкталбаган учурда арыз жараксыз деп эсептелет.
  3. Кайрылуу арыздар балл берүү системасына ылайык баалангандан кийин эң жогорку балл алган студенттерден башталып тизмеге коюулуп, жатаканага негизки тизмеси менен өткөн студенттердин тизмеси жана кошумча (резервде турган) студенттердин тизмеси түзүлөт. Белгиленген убакыт аралыгында каттоодон өтпөгөн студенттер жатаканада жашоо укугунан айрылат жана алардын ордуна кошумча (резервде турган) тизмедеги студенттер кезегине жараша кабыл алынат.
  4. 2019-2020 окуу жылы үчүн төмөндөгү таблицада белгиленген. Жаңы окуу жылында жатакана төлөмдөрүндө өзгөрүү болсо кайрадан жарыяланат.

(Жатакана наркынан тышкары ар бир студенттен депозит 2500 сом алынат).

 

А БЛОК

Б БЛОК

С БЛОК

ДАЯРДОО КУРСУНУН  СТУДЕНТТЕРИ

-------

 

11.400 СОМ

 

11.400 СОМ

ЖОГОРКУ  КУРС СТУДЕНТТЕРИ

14.250 СОМ

11.400 СОМ

11.400 СОМ

САБАКТАРЫ  МАЙ АЙЫНДА  АЯКТООЧУ ЖОГОРКУ  КУРС СТУДЕНТТЕРИ (КОТОРМОЧУЛУК.ТУРИЗМ Ж.Б.)

 

 

12.750 СОМ

 

 

10.200 СОМ

 

 

10.200 СОМ

АКЫРКЫ КУРСУНУН СТУДЕНТТЕРИ

15.000 СОМ

 

12.000 СОМ

12.000 СОМ

 

  1. Жатаканага жайгашууда окуу жылынын аягына чейинки төлөм болуп  накталай банкка төлөнөт (Накталай төлөй албагандар үчүн экиге бөлүп төлөө жеңилдетүүсү каралган).
  2. КТМУ тарабынан чет өлкөлөргө практикага кеткен жана негизки кезек тизмеси менен жатаканага жайгашуу укугуна ээ болгон  студенттердин (орундары) сакталуу калат.  Бирок бул студенттер да башка студенттер сыяктуу эле Сентябрь айынан баштап жатаканада жашоо акысын төлөшөт.

 

 

 

Кыргызстандын айрым калктуу аймактарында  11-майдан (саат 00:00дон) тарта өзгөчө абал аяктайт.

 Бишкек, Ош шаарларына, Нарын облусунун Ат-Башы районуна жана Жалал-Абад облусунун Чаткал районуна карантин киргизилет.

Биринчи вице-премьер-министр Кубатбек Бороновдун айтуусунда төмөнкүдөй өзгөрүүлөр киргизилет:

Коменданттык саат алынып салынат; Санитардык-эпидемиологиялык талаптарга байланышкан чектөөлөр күчүндө калат;

Аталган аймактарда санитардык-карантиндик посттор орнотулат.

Өткөрмө кагаздар дагы деле колдонулабы?

Жок. Комендатура тарабынан берилген өткөрмө кагаздардын жарамдуулук мөөнөтү 11-майда (саат 00:00) аяктайт.

Шаар ичинде кимдер жүрө алат?

Ишмердүүлүгүнө уруксат берилген уюмдардын кызматкерлери.

Санитардык-карантиндик посттон кантип өтсө болот?

Анын атайын эрежелери иштелип чыккан. Жарандын колунда иштеген жеринен берилген маалымкаты болуш керек, маалымкат салык кызматы тарабынан мөөр менен күбөлөндүрүлүүсү зарыл.  Салык кызматы тарабынан маалымкат алуу үчүн жарандар сөзсүз беткап кийип, кезекке турууда аралыкты сактоосу керек.  

Маалымкат Чүй облусунун аймагында жашап, бирок Бишкек шаарында иштегендер үчүн гана талап кылынат. Бишкекте жашап жана иштегендер үчүн маалымкаттын кереги жок.

Жаңы шарттарда кантип иштөө керек?

Мүмкүн болушунча аралыктан үйдө иштөө сунушталат. Кеңселердеги кызматкерлердин санын колдон келишинче азайтуу, иштеп жаткандардын арасында коопсуздук үчүн аралыкты сактоо зарыл.

Экономиканын иштей баштаган объекттери бардык санитардык эрежелерди сактоого тийиш.

Троллейбус жана автобустар жүрө баштайбы?

Жок, коомдук транспорт азырынча иштебейт.

Азырынча такси кызматына гана уруксат берилген.

Эмне үчүн бул аймактарга карантин киргизилди?

Анткени, эксперттердин жана адистердин маалыматы боюнча бул аймактарда вирусту жугузуу коркунучу жогору бойдон калууда.

Бир облустан экинчи облуска каттаса болобу?

Жок. Аймактар аралык каттамдарга мурдагыдай эле чектөө киргизилген.

Жеке автоунаа менен жүрүүгө болобу?

Болот, бирок өтө зарыл учурда жана жумушка баруу үчүн гана жүрүүгө болот.

Ифтарга адамдарды чогултса болобу? Жалпы иш-чараларга уруксат берилдиби?

Жок. Көп киши катышкан иш-чараларга тыюу салынган. Ифтар үчүн айып салынат.

Карантиндик шарттарда буларды ким жөнгө салат?

Жергиликтүү башкаруу органдары, Бишкекте - борбордун мэриясы.

Президент Сооронбай Жээнбеков бүгүн, 28-майда «Кыргыз Республикасынын президентинин кээ бир чечимдерине өзгөртүүлөрдү киргизүү жөнүндө» жарлыкка кол койду. Бул тууралуу өлкө башчынын басма сөз кызматы билдирди.

Жарлыкка ылайык, Бишкек, Ош, Жалал-Абад шаарларынын жана Нарын облусунун Ат-Башы районунун аймактарында өзгөчө абал режими 2020-жылдын 10-майына (10-май кошулат) чейин узартылууда.

Аталган жарлык кол коюлгандан тарта күчүнө кирет жана Кыргыз Республикасынын Жогорку Кеңешине бекитүү үчүн жиберилет.

Карантинге байланыштуу студенттер үйү, окуу жылынын акырына чейин төлөм жасаган студенттерге 2020-жылдын 15-мартына чейинкисин гана кармап, калган төлөмдөрүн Демир банк эсеби аркылуу кайтаруу иштерин баштады. Карантиндин бүтүшү менен студенттер жатакана тарабынан берилген жууркан, жаздык, шейшеп ж.б тапшырып, студенттер үйүнөн расмий чыгыш иштерин бүтүргөндөн кийин гана депозит катары төлөнгөн 2500сомду Демир банк студенттердин эсебине которот.

Кыргыз Республикасынын аймагындагы коронавирус илдети менен күрөшүүгө жардам көрсөтүү максатында университетибиздин академиялык жана административдик кызматкерлери өз каражаттарынан бөлүп жалпысынан 134244 (жүз отуз төрт миң эки жүз кырк төрт) сом чогултушту. Чогултулган акча каражат Кыргыз Республикасынын Финансы министрлигинин Борбордук казыналыгында ачылган № 4402011000101373 «Кыргыз Республикасынын Саламаттык сактоо министрлиги – коронавирус боюнча иш-чаралар» (БИК 440001) администрацияланган эсебине 2020-жылдын 13-апрелинде которулду.

Урматтуу университетибиздин жамааты, кошкон салымдарыңыз үчүн терең ыраазычылык билдиребиз!

 

Ректорлук

2020-жылдын 30-мартында университеттин ректорлугунун (ректор, биринчи проректор, проректорлор жана башкы катчы) телеконференция аркылуу жыйыны өткөрүлүп, төмөндөгү көрсөтмөнү күчүнө киргизүү чечими кабыл алынган.

Бардык студенттердин, академиялык жана административдик кызматкерлердин бул көрсөтмөдө камтылган талаптарды аткарыш үчүн, тийиштүү иштерди жүргүзүүнү өтүнөбүз.

  

Кыргыз-Түрк “Манас” университетинин ректорлугу

 

2020-03-НОМЕРЛҮҮ КӨРСӨТМӨ

 

  1. УНИВЕРСИТЕТТИ БАШКАРУУ:
    1. Кыргыз Республикасында 2020-жылдын 25-мартынан 15-апрелине чейин өзгөчө абал жарыяланган. Ушул себептен улам университеттин уюштуруучулук түзүмүнө ылайык милдеттери, ыйгарым укуктары жана жоопкерчиликтери аныкталган университеттин ар кыл даражадагы жетекчиси өзгөчө абалга тиешелүү чечимдерди эске алып, коронавирус (COVID-19) илдети менен күрөшүү чараларынын алкагында социалдык аралыкты сактап, маалыматтык технологиялардын жардамы менен аралыктан иштөө ыкмаларын колдонуп, мүмкүн болушунча аз сандагы кызматкерлер, биринчи кезекте студенттик шаарчада жашаган кызматкерлер менен өз милдеттерин аткарат. Бул мүмкүн болбогон учурда, ректорат менен макулдашып, башка кызматкерди дайындайт.
    2. Университеттин башкы корпусундагы иш-чаралардын саны мүмкүн болушунча азайтылат, университеттин бардык иштери жана иш-чаралары Чыңгыз Айтматов атындагы студенттик шаарчада жүргүзүлөт.
    3. Социалдык аралыкты сактоо жана адамдар ортосундагы байланышты азайтуу үчүн бардык жыйындар жана сүйлөшүүлөр маалыматтык технологияларды жана телеконференция системасын колдонуу менен өткөрүлөт. Бул өңүттө университеттин ар кыл даражадагы жетекчиси керектүү материалдык-техникалык базаны түзүүгө тийиш. Зарыл болгон учурда маалыматтык технологиялар башкармалыгына кайрылып, жардам сурай алат.
    4. Университтетин Ч. Айтматов студенттик шаарчасын башкаруу иши проректор проф. Исмаил Шенге жана анын орун басары болуп башкы катчы Зия Арпалыга жүктөлөт. Жетекчи өзүнүн орун басары менен чогуу зарыл учурларда ректорат менен макулдашып, бардык иш-чараларды жана иштерди пландаштыруу, координациялоо жана көзөмөлдөө боюнча чечимдерди кабыл алууга, чараларды көрүүгө жана аткарууга укуктуу.
      Студенттик шаарчанын жетекчилиги тарабынан студенттик шаарчада жашагандар менен иштегендердин ден соолугун жана студенттик шаарчанын коопсуздугун сактоого өзгөчө маани берилет, студенттик шаарчага кирүү-чыгуулар текшерилет.
      Декандар, мүдүрлөр, башкармалыктардын башчылары жана ректоратка караштуу түзүмдөрдүн жетекчилери студенттик шаарчанын жетекчилиги менен кызматташып, түзүмдөрдүн иш-чараларын токтоосуз жана координациялуу түрдө жүргүзүшөт.
      Студенттик шаарчанын жетекчилиги керектүү маселелер жана жагдайлар боюнча ректорат менен макулдашып, кошумча чечимдерди кабыл алып, тийиштүү чараларды көрүп, аларды жарыялайт.
    5. Университет тарабынан кабыл алынган ар бир чечим, аныкталган жана көрүлгөн бардык чаралар университеттин веб-сайтында жарыяланып турат. Университеттин веб-сайты негизги маалымат булагы болуп саналат. Башка расмий эмес булактарда жарыяланган маалыматтарга маани берилбейт. Веб-сайтты башкаруу иши университеттин басма сөз жана коом менен байланыш бюросунун мүдүрү док. Бүлент Намал тарабынан жүргүзүлөт.

 

  1. ЖАЛПЫ АДМИНИСТРАТИВДИК ИШТЕР:
    1. Ректораттын чечимдерине ылайык жалпы административдик иштер башкы катчынын багыт берүүсүндө жана башкаруусунда, башкармалыктардын башчыларынын жана ректоратка караштуу түзүмдөрдүн жетекчилеринин жетекчилиги жана жоопкерчилиги астында жүргүзүлүп, кызматташууга жана координациялуу түрдө иштөөгө өзгөчө маани берилип, административдик иштер аралыктан иштөө ыкмаларынын жана технологияларынын жардамы менен жүргүзүлөт.
    2. Университеттин маалыматтык технологиялар башкармалыгы муктаж болгон академиялык жана административдик түзүмдөрдү техникалык жактан камсыздоого жооптуу.
    3. Өзгөчө абал учурунда студенттик шаарчалардын коопсуздугуна өзгөчө маани берилет. Чыңгыз Айтматов атындагы студенттик шаарчада жашаган студенттердин жана кызматкерлердин саламаттыгы, коопсуздугу, тамактанышы жана жайгаштырылышы боюнча суроо-талаптар кылдаттык менен каралып, колдо болгон мүмкүнчүлүктөргө ылайык тийиштүү чаралар көрүлөт.
    4. Студенттер жана кызматкерлер жетекчилер менен байланыша ала турган телефон номерлер веб-сайтта жарыяланган. Ошондой эле алар социалдак тармак аркылуу байланыша алышат.

 

  1. ОКУУ-ТАРБИЯЛЫК ИШТЕР:
    1. Окумуштуулар кеңешинин 2020-жылдын 23-мартындагы чечимине ылайык, университетте аралыктан окутууга өтүлгөн. Мындан сырткары бардык окуу-тарбиялык жана илимий иштер 2020-жылдын 15-апрелине чейин токтотулган.
    2. Аралыктан окутууда колдонула турган ыкма жана технологиялар боюнча студенттерге жана окутуучуларга тийиштүү маалыматтар аралыктан берилет.
    3. Аралыктан окутууну координациялоо үчүн Окумуштуулар кеңешинин 2020-жылдын 23-мартындагы жыйынында аралыктан окутууну координациялоо комиссиясы түзүлгөн. Бул комиссиянын төрагасы проф. Исмаил Шен, мүчөлөрү проф. Анварбек Мокеев, проф. Али Осман Солак, доц.м.а. Роза Абдыкулова, доц.м.а. Махмут Вурал, доц.м.а. Гүнтекин Шимшек, Гүнхан Айхан жана Азизбек Усубалиев.
    4. Аралыктан окутуу иштерин координациялоо менен аны жигердүү жүзөгө ашырууга жооптуу болгон аралыктан окутууну координациялоо комиссиясы анын ийгиликтүү жана натыйжалуу болушун арттыруу үчүн ректорат менен макулдашып, академиялык түзүмдөрдөн келген сунуштарды да карап чыгып, тийиштүү чечим кабыл алууга жана чараларды көрүүгө ыйгарым укуктуу.
    5. Декандар жана мүдүрлөр өз факультеттеринде жана жогорку мектептеринде аралыктан окутуу иштерин натыйжалуу ишке ашыруу үчүн Окумуштуулар кеңеши жана ректорат тарабынан кабыл алынган чечимдерге, ректорат тарабынан көрүлө турган чараларга жана бериле турган көрсөтмөлөргө ылайык, бул иш-чараларды координациялоо, көзөмөлдөө жана баалоо боюнча жооптуу болушат. Декандар жана мүдүрлөр аралыктан окутууну координациялоо комиссиясы менен макулдашып, зарыл чараларды көрүүгө ыйгарым укуктуу.
      Бөлүм башчылар бөлүмдөрүндө аралыктан окутуу иштерин жигердүү түрдө ишке ашыруу үчүн бул иш-чараларды координациялоо, көзөмөлдөө жана баалоо боюнча декандардын жана мүдүрлөрдүн алдында жооптуу болушат жана алар менен кызматташып, координациялуу түрдө иш алып барышат.
    6. Ректораттан, аралыктан окутууну координациялоо комиссиясынан, декандардан жана мүдүрлөрдөн түзүлгөн электрондук байланыш программасы (Whatsapp сыяктуу) маалыматтык технологиялар башкармалыгы тарабынан орнотулат жана бул программа аркылуу түзүмдөр арасында маалымат жана тажрыйба алмашуу жүргүзүлөт.
      Ушуга окшош дагы бир программа аралыктан окутууну координациялоо комиссиясы менен бөлүм башчыларынын бирге иштөөсү, маалымат жана тажрыйба алмашуусу үчүн университеттин маалыматтык технологиялар башкармалыгы тарабынан бөлүм башчыларына да орнотулат.
    7. Аралыктан окутууну координациялоо комиссиясы декандар жана мүдүрлөр менен кызматташып, “Манас” университетинин студенттерди тандоо жана жайгаштыруу борборунун башчылыгынын жетекчилигинде аралыктан окутуу иштеринин абалын аныктоо, маселелерди чечүү, кызматташтыкты бекемдөө, сунуштарды жана нааразычылыктарды баалоо жана маселелерди чечүү жолдорун табуу үчүн студенттер жана окутуучулар арасында интернет аркылуу сурамжылоо жүргүзөт.
    8. Аралыктан окутууну координациялоо комиссиясы жазгы семестрди аралыктан окутуу аркылуу аяктоо ыктымалдыгын эске алып, окуу-тарбиялык иштер менен сынактарды коопсуз өткөрүү үчүн колдонула турган ыкма жана технологияларды изилдеп, ректоратка сунуштайт.
    9. Декандар, мүдүрлөр жана бөлүм башчылары түзүлгөн виртуалдык студенттик тайпаларга студенттер сыяктуу катталышып, окутуучулар жана студенттер менен байланыш түзө алышат, маалымат бере алышат жана сабактарды көзөмөлдөй алышат.
      Бул сыяктуу иш-чара Ректорат тарабынан да жүзөгө ашырылат.
    10. Жарым ставкада жана саатына акы алып иштеген окутуучулар да сабактарын аралыктан өткөрүшөт, кабыл алынган чечимдерди, эрежелерди жана чараларды аткарышат. Окутуучуларга керектүү кеңештер, маалыматтар жана техникалык жардамдар тийиштүү декандын же мүдүрдүн колдоосу менен бөлүм башчылары тарабынан берилет.
      Декандардын жана мүдүрлөрдүн сабак өткөрүлгөдүгү тууралуу маалыматтары эске алынып, жарым ставкада жана саатына акы алып иштеген окутуучуларга акы төлөө улантылат.
      Практикалык сабактарды окуткан окутуучулардын акылары болсо, сабактар аралыктан окутулган учурда төлөнөт.

 

  1. ФИНАНСЫЛЫК МАСЕЛЕЛЕР:
    1. Коронавирус (COVID-19) илдети глобалдык экономикалык кризиске себеп болгонунан улам бул кризис өлкөлөрүбүзгө зыян келтирери шексиз. Ушундан улам бардык түзүмдөрдөгү сарптоолор боюнча максималдуу үнөмдөө аракеттери жасалат.
      Зарыл учурлардан сырткары бардык сарптоолор, сатып алуулар жана тендерлер токтотулат.
    2. Жумушчуларды иштетүү боюнча максималдуу үнөмдөө аракеттери жасалат. Коронавирус (COVID-19) илдетинен улам Кыргыз Республикасынын Өкмөтү кабыл алган чечимдерди эске алуу менен, университеттин тийиштүү түзүмдөрү тарабынан кабыл алынган чечимдер боюнча мындан ары иштөөсү мүмкүн болбогон убактылуу кызматкерлерге алардын эмгек укугу сакталуу менен акы төлөнбөгөн өргүү берилет.
    3. Окумуштуулар кеңешинин 2020-жылдын 23-мартындагы чечимине ылайык аралыктан окутууга өтүүгө байланыштуу, стипендия төлөмдөрү кайрадан окутуунун адаттагы формасына өткөнгө чейин токтотулат.

 

  1. ЖҮЗӨГӨ АШЫРУУ:

Бул көрсөтмө Кыргыз-Түрк “Манас” университетинин ректораты тарабынан тийиштүү академиялык жана административдик түзүмдөр менен кызматташуунун негизинде жүзөгө ашырылат.

 

  1. КҮЧҮНӨ КИРИШИ:

Бул көрсөтмө 2020-жылдын 1-апрелинен тарта жаңы кулактандыруу жарыяланганга чейин күчүндө болот.

Президент Сооронбай Жээнбеков бүгүн, 24-мартта «Кыргыз Республикасынын Бишкек шаарынын аймагында өзгөчө абал киргизүү жөнүндө» жарлыкка кол койду. Бул тууралуу өлкө башчынын басма сөз кызматы билдирди.

Жарлыкта төмөндөгүлөр белгиленет:

«2020-жылдын 11-мартында Дүйнөлүк саламаттык сактоо уюму COVID-19 жаңы коронавирустук инфекциясынын (мындан ары коронавирустук инфекция) жайылышын пандемия катары жарыялады.

2020-жылдын 18-мартынан 23-мартына чейинки мезгил аралыгында Кыргыз Республикасынын аймагында жарандардын коронавирустук инфекцияны жуктуруп алган 16 фактысы тастыкталды.

Кыргыз Республикасынын Конституциясынын 64-беренесинин 9-бөлүгүнүн 2-пунктуна, «Өзгөчө абал жөнүндө» Кыргыз Республикасынын конституциялык мыйзамынын 3-4 жана 7-беренелерине ылайык, жарандардын өмүрүн жана саламаттыгын сактоонун, алардын коопсуздугун жана коомдук тартипти камсыз кылуунун өзгөчө кызыкчылыгын көздөп, ошондой эле Кыргыз Республикасынын башка аймактарына коронавирустук инфекциянын жайылышын болтурбоо максатында токтом кылам:

  1. Кыргыз Республикасынын Бишкек шаарынын аймагында 2020-жылдын 25-мартынан саат 08.00дөн баштап 2020-жылдын 15-апрелине саат 08.00гө чейин өзгөчө абал киргизилсин.
  2. Өзгөчө абал киргизилген мезгилде Кыргыз Республикасынын ички иштер министринин орун басарыОрозалиев Алмазбек КыдырмаевичКыргыз Республикасынын Бишкек шаарынын коменданты болуп дайындалсын.
  3. Өзгөчө абал режимин камсыз кылуу үчүн Кыргыз Республикасынын Бишкек шаарынын аймагында комендатура түзүлсүн.
  4. Кыргыз Республикасынын Бишкек шаарынын комендатурасы жөнүндө жобо тиркемеге ылайык бекитилсин.
  5. Кыргыз Республикасынын Бишкек шаарынын аймагында төмөнкүдөй өзгөчө чаралар, жарандардын укуктарын жана эркиндигин убактылуу чектөөлөр жана алардын кошумча милдеттери аныкталсын:

1) коменданттык саат киргизилсин;

2) жарандардын келип-кетүүсүнүн өзгөчө режими киргизилсин;

3) айрым жарандарга белгиленген мөөнөткө өз үйүн (батирин) же болбосо обсервацияда же дарыланууда болгон жерди таштап кетүүгө тыюу салынсын;

4) коомдук тартипти сактоого, стратегиялык объекттерди жана калктын жашоо-турмушун камсыз кылуучу объекттерди коргоого ички иштер жана коргоо маселелерин тескеген ыйгарым укуктуу мамлекеттик органдардын бөлүктөрү тартылсын;

5) оюн-зоок, спорттук жана башка массалык иш-чараларды, ошондой эле иш таштоолорду, чогулуштарды, митингдерди, көчө жүрүштөрүн, демонстрацияларды жана пикеттерди өткөрүүгө тыюу салынсын;

6) аймактын жашоочусу болбой туруп коомдук тартипти бузгандар, анын ичинде чет элдик жарандар да алар туруктуу жашаган жерге же өзгөчө абал жарыяланган жерден тышкары жерге өздөрүнүн каражаттарынын эсебинен чыгарып жиберилсин;

7) ишканалардын жана уюмдардын продукция өндүрүү жана жеткирүү боюнча ишин камсыз кылуу максатында алардын иш планына өзгөртүүлөр киргизилсин, ишканалардын, мекемелердин жана уюмдардын иштөөсүнүн өзгөчө режими белгиленсин, ошондой эле алардын чарбалык ишинин башка маселелери чечилсин;

8) жүйөлүү себептер боюнча бошотулган учурларды кошпогондо, жумушчулардын жана кызматчылардын өз каалоосу боюнча иштен бошонуусуна тыюу салынсын;

9) карантин киргизилсин жана милдеттүү болгон башка санитардык-эпидемиологиялык иш-чаралар өткөрүлсүн;

10) коронавирустук инфекциянын жайылышын болтурбоо үчүн мамлекеттик ишканалардын, мекемелердин жана уюмдардын ресурстары колдонулсун;

11) коронавирустук инфекциянын жайылышын болтурбоо үчүн эмгекке жарамдуу жарандар эмгекти жана саламаттыкты коргоонун талаптарын милдеттүү түрдө сактоо менен тартылсын;

12) эгерде өзгөчө абал жарыяланган аймакта түзүлгөн кырдаалды курчутуу үчүн колдонулушу мүмкүн болсо, анда жалпыга маалымдоо каражаттарын контролдоо киргизилсин;

13) байланышты пайдалануунун өзгөчө эрежелери киргизилсин;

14) дипломатиялык кызматтардын транспортун кошпогондо, транспорт каражаттарынын, анын ичинде чет элдик транспорт каражаттарынын кыймылы чектелсин жана аларды карап чыгуу жүргүзүлсүн;

15) жарандар массалык топтолгон жерлерде документтер текшерилсин;

16) жеке иш-чараларды (үйлөнүү тойлорун, туулган күндөрдү белгилөөнү жана башка иш-чараларды) өткөрүү жөнгө салынсын;

17) өзгөчө абал жарыяланган аймакта жашаган жарандар үчүн төмөнкүдөй кошумча милдеттер киргизилсин:

- өздүк коопсуздукту камсыз кылуу боюнча алдын ала чараларды көрүү;

- күнүмдүк иште коопсуздук чараларын сактоо, коронавирустук инфекциянын жайылышына алып келиши мүмкүн болгон бузууларга жол бербөө;

- жеке коргонуу каражаттарын колдонуу эрежелерин үйрөнүү;

- коронавирустук инфекциянын жайылышын алдын алууда мамлекеттик бийлик органдарына жана уюмдарга көмөк көрсөтүү;

- коронавирустук инфекциянын жайылышынын коркунучу жөнүндө тиешелүү мамлекеттик органдарга маалымат берүү.

  1. Комендант Кыргыз Республикасынын Бишкек шаарынын аймагында коронавирустук инфекциянын жайылышын болтурбоо, жарандардын өмүрүн жана саламаттыгын сактоо, коопсуздугун камсыз кылуу боюнча толук чараларды көрсүн.
  2. Кыргыз Республикасынын Саламаттык сактоо министрлиги, Кыргыз Республикасынын Ички иштер министрлиги, Кыргыз Республикасынын Улуттук коопсуздук мамлекеттик комитети, ошондой эле Кыргыз Республикасынын Куралдуу Күчтөрүнүн Генералдык штабы, ишке тартылган башка мамлекеттик органдар жана жергиликтүү өз алдынча башкаруу органдары жарандардын өмүрүн жана саламаттыгын сактоодо, коопсуздугун камсыз кылууда, ошондой эле Кыргыз Республикасынын башка аймактарына коронавирустук инфекциянын жайылышын болтурбоодо Комендантка бардык бар болгон каражаттары жана күчтөрү менен ар тараптан көмөк көрсөтсүн.
  3. Кыргыз Республикасынын Жогорку сотуна өзгөчө абал мезгилинде Кыргыз Республикасынын Бишкек шаарынын аймагында жарандык, жазык, административдик иштердин, жоруктар жөнүндө иштердин, ошондой эле сотко чейинки өндүрүштүн материалдарынын аймактык сотко караштуулугун өзгөртүү укугу берилсин.
  4. Кыргыз Республикасынын Башкы прокуратурасына:

1) ушул Жарлыкта белгиленген чараларды жана убактылуу чектөөлөрдү ишке ашырганда мыйзамдардын сакталышына көзөмөлдү камсыз кылсын;

2) өзгөчө абал мезгилинде Кыргыз Республикасынын Бишкек шаарынын аймагында мыйзамда белгиленген тергөөгө караштуулукту өзгөртүү укугу берилсин.

  1. Түзүлгөн кырдаалды курчутууну болтурбоо максатында жалпыга маалымдоо каражаттары өзгөчө абал киргизилген мезгилде Комендант берген маалыматтарды таратсын.
  2. Бул жарлык Кыргыз Республикасынын Жогорку Кеңешине жиберилсин.
  3. Бул жарлык кол коюлган учурдан баштап күчүнө кирет».

 

РЕКТОРАТ

R.30.2020/                                                                                                                   

Тема : Маршруттук баракча                                                                                

25.03.2020

 

Бишкек шаарында коронавирустун жайылышын чектөө максатында киргизилген коменданттык саат шарттарында ар бир шаар тургуну үйүнөн  чыкканда жанында өздүгүн тактаган документин (паспорт) жана ылдыйда көрсөтүлгөн анкетаны толтуруп алып жүрүүсү зарыл. Анкетаны толтуруу жөнүндө маалыматты университетин академиялык кызматкерлерине түшүндүрүү иши факультеттердин жана жогорку мектептердин катчыларына, ал эми административдик кызматкерлерге түшүндүрүү Баш катчылыкка жүктөлсүн.

 

Форманын жайгаштырылган жери:  ftp/rektörlük/asel asanbekova

 

 

Биринчи проректор

А.А. Кулмырзаев

 

 

Таркатуу :

-академиялык жана административдик биримдер

               РЕКТОРАТ

R.30.2020/                                                                                                                  

Тема: Жардам берүү                                                                                               

25.03.2020

 

Кыргыз Республикасында коронавирус менен күрөшүү үчүн каражат чогултуу демилгеси көтөрүлүп, катардагы жарандар, ишкерлер, мамлекеттик жана жеке менчик мекемелердин кызматкерлери өз салымдарын кошууда. Университетибиздин ректораты ушул кат менен бардык окутуучу-профессордук курамыбызды жана административдик кызматкерлерибизди коронавирус менен күрөшүүгө жардам берүүгө чакырат. Ыктыярдуу түрдө чогултулган каражаттар университетибиздин Баш катчылыгында топтолуп, Кыргыз Республикасынын саламаттык сактоо министрлигинде ачылган атайын эсепке которулат.

 

 

Биринчи проректор

А.А. Кулмырзаев

 

Таркатуу:

-Академиялык жана административдик биримдер;