2025-03-04
ТУРИЗМ БОЮНЧА КЫРГЫЗСТАНДАГЫ ЭҢ БИРИНЧИ ДОКТОРАНТУРА (PhD) ПРОГРАММАСЫ
Кыргыз-Түрк Манас университетинин Ректорлугунун, ЖОЖдон кийинки билим берүү институтунун жана айрыкча Туризм факультетинин жетекчилигинин илимий-изилдөөчүлүк көрөгөчтүгүнө негизделген иш-аракеттердин натыйжасында туризм тармагына тиешелүү изилдөөлөр Кыргызстанда өз алдынча илимий багыт катары таанылып, анын негизинде «Туризм» боюнча өлкөбүздөгү эң биринчи Докторантура (PhD) программасы «Саякат иши жана гид кызматы» бөлүмүндө 2024-2025-окуу жылынан тартып иштей баштады. «Туризм» багыты боюнча Кыргызстандагы алгачкы жана азырынча жалгыз болгон Докторантура (PhD) программасына берилген квотага ылайык, документтерин тапшырган талапкерлердин ичинен эң мыкты бешөөсү тиешелүү эки баскычтуу экзамен аркылуу тандалып алынды. Натыйжада Асель Капарова, Мырзагүл Бактыбек кызы, Элбек Калбеков, Акиф Коркмаз жана Сүйүнбек Чыкынов аталган докторантурада тереңдетилген адистик билим алуу жана илимий-изилдөөчүлүк иштерин башташты.
Атаандаштык күч алган эл аралык туристтик рынокто бир бүтүн дестинация катары тааныла баштаган жалпы Борбордук Азияда, анын ичинде өзгөчө Кыргызстанда туризм тармагын туруктуу өнүктүрүү жана башкаруу үчүн илимге негизделген стратегиялар учурдун талабы болууда. Бул өңүттөн караганда бөлүмүбүздө ачылган «Туризм» боюнча Докторантура (PhD) программасынын алгачкы докторанттарынын илимий-изилдөөчүлүк эмгектеринен жана болочок диссертациялык иштеринен үмүтүбүз чоң. Докторант жаштарыбыздын талыкпас эмгектеринин натыйжасында өлкөбүздөгү татаал социалдык-экономикалык кубулушка айланып бара жаткан туризм тармагынын бир кыйла көйгөйлөрү илимий негизде чечилерине терең ишенебиз!
