2025-02-25
“Биологиялык терминдердин кыргызча–орусча, орусча–кыргызча сөздүгү”
2024-жылдын 19-декабрында Кыргыз-Түрк "Манас" университетинин Табигый илимдер факультетинин Биология бөлүмү эки маанилүү эмгекти коомчулукка сунуштады. Бул иш-чарада профессордук-окутуучулук курам тарабынан даярдалган төмөнкү китептердин бет ачары өткөрүлдү:
“Биологиялык терминдердин кыргызча–орусча, орусча–кыргызча сөздүгү”
Кыргыз тилинде даярдалган бул сөздүк биологиялык терминдердин так жана туура колдонулушун камсыздоо максатында түзүлүп, изилдөөчүлөр, студенттер жана окутуучулар үчүн баа жеткис ресурс болуп саналат.
“Кыргыз эли салттык дарыгерликте жана үй чарбасында колдонгон кээ бир өсүмдүктөр” аттуу каталог.
Бул каталогдо кыргыз элинин салттык дарыгерлик тажрыйбасы жана турмуш-тиричилигинде колдонулуп келген өсүмдүктөр тууралуу маалыматтар камтылган. Китеп этнобиология жана өсүмдүктөрдү практикалык колдонуу боюнча уникалдуу маалыматтарды сунуштайт.
Иш-чарада китептердин авторлору өздөрүнүн эмгек процесси, изилдөөлөрүнүн мааниси жана бул китептердин илимий коомчулук менен билим берүү тармагындагы орду тууралуу маалымат беришти. Уюштуруучулар бул эмгектер биология илимин жайылтууга жана салттык билимди сактоого өзгөчө салым кошот деген ишенимде.
Бул иш-чара илим, тил жана маданияттын кесилишиндеги маанилүү кадам болуп, жаңы муундар үчүн практикалык жана тарыхый маалыматтарды жеткиликтүү кылууга багытталган.