Жаңылыктар

2025-жылдын 24-февралында Кыргыз – Түрк «Манас» университети жана Киото эл аралык университети ортосунда түзүлгөн меморандумдун алкагында Япониянын Хоккайдо университетинин Табигый илимдер факультетинин, Жер жана планетаны изилдөө багытында билим алып жаткан докторант студенти Чика Земмото биология бөлүмүндө өзүнүн илимий темасы боюнча “Comparative Genomic Analysis Reveals Distinct Population Histories of Domestic Yak in Central Asia” аттуу семинар өткөрдү. Семинарда биология жана биотехнология багытында билим алып жаткан студенттер менен тажрыйба алмашылды.

Бул изилдөө Орто Азиядагы топоздордун популяцияларындагы генетикалык айырмачылыктарды жана алар менен байланышкан тарыхый процесстерди талдоого багытталган. Орто Азиядагы топоздордун популяциялары өзүнүн биологиялык бай түрдүүлүгүн сактап калганы, айрыкча алардын генетикалык структурасындагы айырмачылыктар жана аймактык өзгөрүүлөр боюнча жүргүзүлгөн изилдөөлөр өзгөчө мааниге ээ. Изилдөөнүн алкагында Кыргызстандын Ысык – Көл аймагын байырлаган топоздордон алынган жыйынтыктар башка популяциялардан айырмаланып жогорку генетикалык ар түрдүүлүккө ээ экендиги далилденген.

Семинардан кийин Чика Земмото изилдөөсүнүн жыйынтыктары боюнча катышуучулар менен талкуу жүргүздү. Талкуулардын негизинде генетикалык анализдин мааниси, анын экологияга жана мал чарбачылыгынын өнүгүшүнө тийгизген таасирлери боюнча ойлор бөлүшүлдү. Биология жана биотехнология багытында билим алып жаткан студенттер Чика Земмотонун көптөгөн практикалык кеңештерин угуп, геномика, биотехнология жана генетикалык инженерия тармактарындагы суроолорго жооп алууга мүмкүнчүлүк алышты.