“Манас” университетинен агрономдор жана дыйкандарга инновациялык чечимдер
Бүгүнкү күндүн агрардык тармагындагы көйгөйлөрдү чече ала турган жогорку квалификациялуу адистерди даярдоого багытталган КТМУнун айыл чарба факультети тарабынан “Заманбап мөмө-жемиш өстүрүүчүлүк” деген темада семинар өткөрүлдү.
2024-жылдын 6-декабрында уюштурулган аталган семинарды факультеттин деканы, PhD., профессор Ахмет Айгүн өтүп, өлкөнүн Чүй, Ысык-Көл жана Талас облустарынан келген айыл чарба жаатындагы адистерге жана дыйкандарга мөмө-жемиш өстүрүүнүн заманбап ыкмалары боюнча деталдуу маалымат берди.
Семинардын жүрүшүндө катышуучулар заманбап багбанчылык жана анын артыкчылыктары, интенсивдүү мөмө-жемиш бактарын өстүрүү, аларга кам көрүү жана салыштырмалуу көбүрөөк түшүм алуу боюнча маалыматтарга ээ болушту.
PhD., профессор Айгүн заманбап мөмө-жемиш өстүрүүчүлүктүн негизги максаты – кичинекей аянттан көп жана сапаттуу түшүм алуу экенин айтып, сөзүн мындай деп улантты: “Эң жакшы шарттарда интенсивдүү багбанчылык кылуунун натыйжасында жогорку сапатка ээ мол түшүм алса болот. Мөмө-жемиш өстүрүүнүн заманбап ыкмалары менен түшүм жыйноо жеңил жана ошол эле учурда убакыттан да, каражаттан да үнөмдөсө болот.”
Туруктуу айыл чарбасына олуттуу салым
Иш-чарада бактарды тандоодо эмнелерге көңүл буруу керектигине токтолгон декан катышуучуларга багбанчылыкты өркүндөтүү боюнча практикалык кеңештерди берди.
Семинар катышуучуларга мөмө-жемиш өстүрүүчүлүк боюнча билимдерин тереңдетип, заманбап ыкмалар менен таанышууга мүмкүнчүлүк берди.
Кыргыз-Түрк “Манас” университети билим берүү жана изилдөө жаатындагы жетишкендиктери менен гана эмес, коомдук өнүгүүгө кошкон конкреттүү салымдары менен да алдыда. КТМУ тарабынан уюштурулуп жаткан мындай иш-чаралар Кыргызстандын айыл чарба тармагын модернизациялоого көмөктөшүп, фермерлерге жана айыл чарба тармагынын адистерине өндүрүштү өнүктүрүүнүн натыйжалуу, туруктуу ыкмаларын колдонууга мүмкүнчүлүк берет.
Haberin Fotoğrafları:
