Жаңылыктар

2-апрель - Бүткүл дүйнөлүк аутизм жөнүндө маалымдоо күнүнө карата Кыргыз-Түрк “Манас” университетинин Үзгүлтүксүз билим берүү борбору социалдык-жоопкерчилик долбоорлорунун алкагында атайын иш-чара уюштурду.

Иш-чаранын алкагында коммуникация факультетинин Артыкбай Сүйүндүков атындагы кинозалында студенттерге аутизм менен жашаган жана айыл чарба тармагында чоң өзгөрүүлөрдү жасаган белгилүү илимпоздун жашоосун баяндаган “Тэмпл Грандин” биографиялык тасмасы көрсөтүлдү.

Коомчулукту аутизм тууралуу кабардар кылуу, толеранттуулукту күчөтүү жана аутизм менен жашаган адамдарга карата жылуу мамилени калыптандыруу максатында уюштурулган иш-чарага КТМУнун проректору, профессор Режаи Доган, үзгүлтүксүз билим берүү борборунун жетекчиси, доцент Эркан Эфилти, окутуучулар жана студенттер катышты.

Проректор, профессор Режаи Доган программада күндүн маанисине жана маңызына көңүл буруп, аутизм менен жашаган адамдардын коомдо тең укуктарга ээ экенин баса белгиледи. Билим берүү, изилдөө жана коомдук жоопкерчилик негизинде окуу жайдын социалдык-жоопкерчилик, теңдик миссиясына чоң маани берилгенин белгилеген профессор Доган мындай иш-чаралардын маалымдуулукту арттырууда чоң роль ойноорун айтты.

Аутизм менен жашаган адамдар коомдогу мүмкүнчүлүктөрдөн бирдей пайдаланууга укуктуу экенин баса белгилеген проректор: “Алар түшүнүү менен бирге биз сыяктуу инсан экенин унутпашыбыз керек. Бүгүн аутизм менен жашаган бир туугандарыбызды таанып-билүү, толеранттуу инсан болуу тынч дүйнөдө жашоого жардам берет деп үмүттөнөм”, - деди.

Иш-чаранын жүрүшүндө студенттер аутизм тууралуу маанилүү маалыматтар менен таанышып, бул жааттагы маалымдуулуктарын арттырууга мүмкүнчүлүк алышты. Тасмадан  таасирленген көрүүчүлөр сезимдерин бөлүшүп, ойлорун кагазга жазып, дубалга чапташты. Бул маңыздуу иш-чара аутизм менен жашаган адамдардын башынан өткөргөн кыйынчылыктарына көңүл буруу менен бирге коомдо толеранттуу инсандардын тарбиялануусуна салым кошту.