Жаңылыктар

2025-жылдын 27-мартында Кыргыз-Түрк “Манас” университетинин үзгүлтүксүз билим берүү борбору тарабынан “Киберкоопсуздукту маалымдоо”  тренинги” уюштурулду. Аталган тренингди инженердик факультетинин компьютер инженерлиги бөлүмүнүн башчысы, доцент Рита Исмаилова өтүп, ага академиялык кызматкерлер, административдик түзүмдөрдүн жетекчилери жана кызматкерлери менен бирге студенттер чоң кызыгуу көрсөтүштү.

Иш-чаранын алкагында доцент Исмаилова катышуучулар менен киберкоопсуздуктун негизги түшүнүктөрү, бул жаатта көп кездешкен терминдер жана санариптик дүйнөдөгү коркунучтар менен бөлүштү. Мындан тышкары, кибер мейкиндик, кибер кылмыштуулук жана бул кылмыштарды жасаган хакерлер сыяктуу актуалдуу маселелер да кеңири талкууланды.

Тренингде азыркы учурда кеңири тараган кибер коркунучтардын бири болгон “фишинг” темасы боюнча деталдуу маалымат берилди. Катышуучуларга кибер коркунучтардан коргонуу жолдору, онлайн чөйрөдө кездешкен алдамчылыкка каршы көрүлө турган чаралар жана интернетти коопсуз колдонуу боюнча маанилүү маалыматтар берилди.

Доцент Исмаилова  учурда технология тездик менен өнүгүп жаткандыктан адамдар дуушар болушу мүмкүн болгон санариптик коркунучтар көбөйүп баратканын баса белгилеп, киберкоопсуздук техникалык тармакта гана эмес, күнүмдүк жашоонун ажырагыс бөлүгү болуп калганын баса белгиледи.

Катышуучулар тарабынан чоң кызыгуу менен кабыл алынган тренинг ыраазычылык баракчасын тапшыруу жана эстелик сүрөткө түшүү менен аяктады.