30-август — Жеңиш майрамынын 103 жылдыгы Бишкекте белгиленди
30-август — Жеңиш майрамынын урматына Түркия Республикасынын Кыргызстандагы элчилиги тарабынан Бишкек шаарындагы Ататүрк сейил багында гүлчамбар коюу аземи болуп өттү.
Иш-чарага Түркия Республикасынын Кыргызстандагы элчилигинин жана ага караштуу мекемелердин өкүлдөрү, Кыргыз-Түрк "Манас" университетинин ректору, профессор Алпаслан Жейлан, биринчи проректор, саясий и.к., доцент Алмаз Ибраев, башкы катчы, профессор Исмет Алтынташ, университеттин академиялык жана административдик кызматкерлери, Билим берүү кеңешине караштуу мекемелердин окутуучулары жана окуучулары, түрк уюмдарынын жетекчилери жана басма сөз кызматынын өкүлдөрү катышты.
Салтанат Ататүрк эстелигине гүлчамбар коюу жана Улуу Ата Мекен үчүн курман болгон баатырларды эскерүү менен башталды. Андан соң Түркиянын улуттук гимни аткарылды.
Иш-чарада сөз сүйлөгөн Түркия Республикасынын Кыргызстандагы элчилигинин Аскер атташеси, полковник Толга Такымжы 30-август Жеңишинин түрк элинин көз карандысыздык жана эркиндик күрөшүндөгү ордуна токтолду.
Полковник өз сөзүндө:
“Бүгүн улуттук күрөштүн акыркы этабы болгон улуу жеңишибиздин 103 жылдыгын жана баатыр армиябыздын – Түрк Куралдуу Күчтөрүнүн күнүн белгилөөдө сыймык жана кубаныч сезип жатабыз. Мүнөзү эркин болгон улуу элибиз, өзүнүн көз карандысыздыгын жана келечегин сактап калуу үчүн душман күчтөргө каршы Гази Мустафа Кемал Ататүрктүн жетекчилигинде "Эркиндик болбосо, өлүм" урааны менен баштаган күрөштү 1922-жылдын 30-августунда улуу жеңиш менен аяктаган”, — деди.
Ошондой эле ал улуу жеңиш түрк элинин көз карандысыздыгын сактоо чечкиндүүлүгүн дүйнөгө жар салганын белгилеп,
“Элибиз биримдик жана ынтымакта турганда жеңе албаган эч бир тоскоолдук жок. Кечээ кандай болсо, бүгүн да Түрк Куралдуу Күчтөрү өлкөбүздүн коопсуздугу жана көз карандысыздыгы үчүн чечкиндүүлүк менен кызмат өтөп жатат", — деп билдирди.
Сөзүнүн соңунда:
“Азиз шейиттерибизди жана түбөлүккө кеткен баатыр ардагерлерибизди ыраазычылык менен эскерем, тирүү ардагерлерибизге терең ыраазычылыгымды билдирем", — деп белгиледи.
Андан соң Түркия Республикасынын Президенти Режеп Тайип Эрдогандын 30-август Жеңиш Майрамы боюнча куттуктоо каты окулду. Эскерүү аземи сүрөткө түшүү менен аяктады.
