Жаңылыктар

Кыргыз-Түрк "Манас" университети (КТМУ) 2026-жылдан тартып Түркиянын чет өлкөлүк студенттерди кабыл алуу сынагы — TR-YÖS аркылуу да эл аралык студенттерди кабыл алат.

Бул чечим менен "Манас" университети ар кайсы өлкөлөрдөн келген талапкерлерди стандарттуу жана өлчөнө турган баалоо системасынын негизинде кабыл алат.

Бул тууралуу билдирген КТМУнун ректору, профессор Алпаслан Жейлан жаңы система талапкер студенттерге эл аралык деңгээлдеги жогорку билим алууга мүмкүнчүлүк түзөрүн белгиледи.

КТМУнун ректору, профессор Алпаслан Жейлан бул колдонмонун университеттин эл аралык деңгээлге чыгуу максаттары менен түздөн-түз байланыштуу экенин баса белгилеп: «TR-YÖS аркылуу студенттерди кабыл ала башташыбыз — университетибизди глобалдык деңгээлде дагы да бекем позицияга жеткирүү максатыбыздын бир бөлүгү. Бул система аркылуу ар түрдүү аймактардан келген студенттердин академиялык деңгээлин объективдүү критерийлер менен баалайбыз».

Профессор Алпаслан Жейлан TR-YÖS системасы университеттин илимий потенциалына түздөн-түз салым кошорун айтып: «Биз жогорку академиялык жетишкендиктери бар студенттер тандаган университет болууну максат кылуудабыз. Бул өз кезегинде билим берүүнүн сапатын жогорулатып, илимий өндүрүмдүүлүктү күчөтөт», — деди.

Талапкер студенттер TR-YÖS аркылуу кабыл алуу шарттары тууралуу университеттин расмий сайты — manas.edu.kg аркылуу маалымат ала алышат.

Түркия менен Кыргызстандын жогорку билим берүү тармагындагы биргелешкен окуу жайы болгон "Манас" университети QS дүйнөлүк рейтингинде алдыңкы миң университеттин катарына кирет. Университеттин бүтүрүүчүлөрү Түркия менен Кыргызстандын дипломдорун алып чыгышат. Кыргыз–Түрк "Манас" университети студенттерине эл аралык деңгээлдеги жогорку билимди акысыз сунуштайт.

Manas TV'nin Haberi: https://youtu.be/pLgheUnOFlo