Кыздардын жаңы жатаканасынын курулушу үчүн протоколго кол коюлду
Кыргыз-Түрк “Манас” университети (КТМУ) студенттерине заманбап, коопсуз жана ыңгайлуу жашоо шарттарын түзүү максатында дагы бир маанилүү инвестициялык долбоорду ишке ашырууда. Университеттин кампусунда курула турган 1000 орундуу жаңы кыздар жатаканасынын курулушу боюнча протоколго кол коюлду.
КТМУнун ректору, профессор Алпаслан Жейлан долбоордун алкагында курулуш иштерин жүргүзө турган компаниянын жетекчилери менен бирге курулуш аянтын жеринен көрүп чыгып, аткарылып жаткан иштер тууралуу маалымат алды. Таанышуу учурунда долбоордун техникалык өзгөчөлүктөрү, ишке ашыруу процесси жана пландалган мөөнөттөр талкууланды.
Долбоордун негизинде жалпы 1000 орунга ылайыкталган заманбап кыздар жатаканасы курулат. Жатакана комплекси төрт өзүнчө имараттан турат. Комплекстин борбордук бөлүгүндө үч кабаттуу социалдык имарат жайгашат. Анда ашкана, китепкана, кафетерий жана студенттердин билим алуу жана социалдык муктаждыктарын камсыздай турган башка жайлар болот.
Университеттин «Жашыл кампус» концепциясынын негизинде иштелип чыккан бул жаңы долбоор студенттердин окуу жана коомдук жашоосун колдогон заманбап кампус чөйрөсүн өнүктүрүүгө салым кошот. Студенттер менен коомдун ортосундагы өз ара байланышты бекемдеген кампус моделинин маанилүү бөлүгү боло турган жаңы жатакана комплекси заманбап талаптарга ылайык долбоорлонгон.
