2026-05-21
Кыргыз Республикасынын Улуттук мугалимдерди даярдоо жана квалификацияны жогорулатуу институтуна академиялык сапар
2026-жылдын 28-апрелинде ОРХУН алмашуу программасынын алкагында Педагогика бөлүмүнө келген Артвин Чорух университетинин Билим берүү факультетинин окутуучусу, доцент, доктор Аржан Айдемир жана бөлүмүбүздүн окутуучусу доктор Кадиян Бообекова менен биргеликте Бишкек шаарындагы Кыргыз Республикасынын Билим берүү, илим жана инновациялар министрлигине караштуу Улуттук мугалимдерди даярдоо жана квалификацияны жогорулатуу институтуна академиялык сапар жасалды.
Сапардын негизги максаты эки өлкөнүн билим берүү программаларынын окшоштуктарын талдоо жана өз ара тажрыйба алмашуу болду.
Программанын алкагында доцент, доктор Аржан Айдемир тарабынан «Социалдык билимдердин тарыхый өнүгүүсү жана мазмуну: кечээден бүгүнкүгө чейин социалдык билимдер» аттуу баяндама жасалды. Баяндамада Социалдык билимдер сабагынын түзүмү, мазмуну, камтыган багыттары, тарыхый өнүгүү процесси жана бүгүнкү күндө Маариф модели алкагындагы өзгөрүүлөр тууралуу кеңири маалымат берилди.
Кыргызстандын билим берүү системасы 12 жылдык билим берүүгө өтүү процессинде турган жана жаңы билим берүү моделдерин издөө иштери күчөгөн мезгилде өткөрүлгөн бул баяндаманын STEM, Табият таануу жана Социалдык билимдер сыяктуу интеграцияланган сабак моделдери боюнча маанилүү салым кошкону белгиленди. Улуттук мугалимдерди даярдоо жана квалификацияны жогорулатуу институтунун жетекчилери жана квалификацияны жогорулатуу программасына катышкан тарых, география, адабият, тил жана коом таануу мугалимдери баяндаманын пайдалуу жана актуалдуу маалыматтарды камтыганын билдиришти.
Институттун директору, доцент, доктор Алмаз Токтомаметов өз сөзүндө бул сапардан чоң канааттануу алганын белгилеп, сунушталган маалыматтар Кыргыз Республикасынын Билим берүү министрлиги тарабынан даярдалып жаткан жаңы окуу программалары менен шайкеш келерин айтты.
Баяндама учурунда окуу программалары, сабак мазмундары, окшоштуктар жана айырмачылыктар боюнча суроо-жооп жана пикир алмашуулар Педагогика бөлүмүнүн окутуучусу доктор Кадиян Бообекова тарабынан которулуп, катышуучуларга жеткирилди. Программа катышуучулардын ыраазычылык билдирүүлөрү жана жалпы сүрөткө түшүү менен жыйынтыкталды.
