2025-02-21
Кыргыз-Түрк «Манас» университетинде Эл аралык эне тил күнү
2025-жылдын 20-февралында Кыргыз-Түрк «Манас» университетинин гуманитардык факультетинин филология бөлүмү тарабынан Эл аралык эне тил күнүнө арналган иш-чара өткөрүлдү. Иш-чаранын ачылышында КТМУ филология бөлүмүнүн башчысы, филол. илимдеринин доктору, проф. Бурул Сагынбаева жана проф. докт. Незахат Жейлан сөз сүйлөп, эне тилинин заманбап муундун, айрыкча филологдордун улуттук аң-сезимин калыптандыруудагы маанисин баса белгилешти.
Студенттер ар кандай тилдерде саламдашкандан кийин көрүүчүлөргө филология бөлүмүнүн студенттери тарабынан даярдалган адабий-музыкалык программа тартууланды. Студенттер өз таланттарын ар кандай жанрларда көрсөтүштү: «Семетей» жана «Курманжан Датка» театралдык сценкалары, кытай чай каадасы, комуз, гитара жана фортепианодо ойноо, ар кыл тилдерде поэзия көркөм окуу, улуттук бийлер, ырлар, попурри ж. б. Иш-чаранын соңунда бардык катышуучулар белгилүү кыргыз ыры «Кыргыз жери» аткарып, кыргыз жеринде тилдер менен маданияттардын биримдигин баса белгилешти. Жыйынтык сөзүндө КТМУ биринчи проректору, саясий илимдердин кандидаты, доц. Алмаз Ибраев филология бөлүмүнө жана анын башчысы, филол. илимдеринин доктору, проф. Бурул Сагынбаевага иш-чараны уюштурганы үчүн ыраазычылык билдирип, филология бөлүмүнүн студенттеринин активдүүлүгүн жана демилгесин белгиледи. Ошондой эле, мындай иш-чаралардын жаштарды көп маданияттуу чөйрөдө тарбиялоодогу маанисин баса белгилеп, Эсенгул Ибраевдин эне тил тууралуу ырын окуп берди.
Иш-чара жандуу, чыгармачыл маанайда өтүп, тил менен маданияттын заманбап коомдогу бириктирүүчү ролун дагы бир жолу тастыктады. Бул баалуулуктардын үлгүсү катары Кыргыз-Түрк «Манас» университети көрсөтүлдү.
.jpeg)
