2025-03-03
Жазгы майрам «Кош бол, кыш! Салам, жаз!»
2025-жылдын 27-февралында КТУ "Манас" гуманитардык факультетинин филология бөлүмүндө үчүнчү курстун студенттери тарабынан уюштурулган жаркын майрам болуп өттү. Бул иш-чара орус тили жана адабияты программасында окуган студенттер тарабынан даярдалган.
Майрамдын коноктору катары филология бөлүмүнүн башчысы, филология илимдеринин доктору, профессор Бурул Сагынбаева, Актау шаарындагы Ш. Есенов атындагы Каспий мамлекеттик технологиялар жана инженерия университетинин окутуучулары, ошондой эле филология бөлүмүнүн окутуучулары жана студенттери чакырылган.
Иш-чараны үчүнчү курстун студенти Райгүл Бактыярова ачып, Орхун алмашуу программасы аркылуу Баку мамлекеттик университетинде окуп келип, тажрыйбасы тууралуу айтып берди. Андан соң, Актаудан келген окутуучуларга сөз берилди. Алар өз университети жөнүндө маалымат берип, мындан ары кызматташуу үмүттөрүн билдиришти.
Студенттер түрдүү конкурстар, музыкалык номерлер жана ар кайсы элдердин жазгы салттары тууралуу баяндар менен бай программа даярдашты. Айрыкча, Нооруз жана Масленица майрамдарына өзгөчө көңүл бурулду.
Майрам кызыктуу, мазмундуу жана көңүлдүү өтүп, катышуучуларга жакшы маанай жана жаздын жагымдуу демин тартуулады.
