Студенттик клубдардын жарманкеси өттү
“Манас” университетинин студенттик клубдары жаңы окуу жылын шыктануу менен баштады. 2023-жылдын 28-сентябрында Касым Тыныстанов атындагы жыйындар залында жана фойеде өткөн иш-чарада студенттик клубдар тааныштырылып, жаңы өкүлдөр шайланды. Студенттер өздөрүнүн кызыгуусуна жана жөндөмүнө ылайык келген ийримдерге катышуу үчүн жарманкеге чоң кызыгуу көрсөтүштү. Программанын ачылыш сөзүн сүйлөгөн Кыргыз-Түрк «Манас» университетинин проректору, доцент Камалбек Карымшаков окуучулардын активдүү катышып жаткан ийримдериндеги ийгиликтери жөнүндө сыймыктануу менен айтты. Доцент Камалбек Карымшаков: "Студенттик ийримдер университеттин жашоосунун ажырагыс бөлүгү жана бул клубдарда алынган тажрыйбалар студенттердин инсандык өнүгүүсүнө чоң салым кошот. Бул жерде биз көрүп жаткан чоң кызыгуу, студенттерибиз бул мүмкүнчүлүктөрдү канчалык баалуу экенин көрсөтүп турат. Биз ар дайым студенттерибиз менен биргебиз. Студенттерге жана жаңы өкүлдөргө ийгилик каалайбыз.”- деп айтты.
Программанын жүрүшүндө студенттик кеңештин төрагасы Бектурсун Сыдыков жана студенттик кеңештин төрагасынын орун басары Бурак Жан жаңы өкүлдөргө ийгилик каалашты. Сөздөрдөн кийин студенттик клубдардын өкүлдөрү өздөрүнүн ийримдери менен тааныштырып, студенттерге ийримдерге кирүү мүмкүнчүлүктөрүн кеңири түшүндүрүштү.
Иш-чаранын жүрүшүндө студенттер өз кызыкчылыктарына ылайыктуу клубдарга мүчө болуу менен университеттик жашоосуна түс кошууга мүмкүнчүлүк алышты. Жылуу маанайда өткөн программа студенттердин коомдук өз ара аракеттенүүсүн арттырып, жаңы достуктун пайдубалын түптөөгө шарт түздү.
ММК жана коомчулук менен байланыш бөлүмү