“Түрк элдеринин салттуу спорт оюндарынын” симпозиуму түрк маданиятын туу чокуга чыгарды
2023-жылдын 11-октябрь күнү Кыргыз-Түрк “Манас” университетинин Касым Тыныстанов жыйындар залында Түркия Республикасынын түптөлүшүнүн 100 жылдыгына арналып уюштурулуп жаткан “Түрк элдеринин салттуу спорт оюндарынын” XII Эл аралык симпозиумунун ачылыш аземи болуп өттү.
Симпозиумга Түндүк Кипр Түрк Республикасынын Кыргызстандагы өкүлү Мехмет Давулжу, Кыргыз Республикасынын Маданият, маалымат, спорт жана жаштар саясаты министринин орун басары, Спорт жана дене тарбия департаментинин директору Абдымомунов Айбек, “Кыргыз-Түрк “Манас” университетинин ректору, профессор Алпаслан Жейлан, биринчи проректор, экономика илимдеринин кандидаты Бактыгүл Каламбекова, борбор калаабыз Бишкек шаарындагы университеттин ректорлору жана проректорлору, бир нече мекеме-уюмдардын өкүлдөрү, университеттин профессордук-окутуучулук курамы, студенттер жана жалпыга маалымдоо каражаттарынын өкүлдөрү катышты.
Аземде эки өлкөнүн гимни жаңырып, Кыргыз-Түрк «Манас» университетинин таанытуу тасмасы менен салттуу спорт оюндары тууралуу даректүү тасманы көрүү менен башталды.
Иш-чаранын ачылыш сөзүндө «Манас» университетинин спорт илимдери факультетинин деканы, профессор Канат Жанузаков симпозиумдун маанилүүлүгүн баса белгилеп мындай деди: “Түрк элдеринин салттуу спорт оюндары” деп аталышы жөн жерден эмес. Түрк мамлекеттери эгемендүүлүккө ээ болгондон кийин салттуу оюндардын менен улуттук спорттун тарыхына, тактикасына жана окутуу усулдарына маани берип жатканын билдирди.
Кыргыз-Түрк «Манас» университетинин биринчи проректору, э.и.к Бактыгүл Каламбекова: “Бүгүн “Түрк элдеринин салттуу спорт оюндарынын” XII Эл аралык симпозиумунда жолугушуп жатканыбызга кубанычтабыз”-деп бул маанилүү иш-чаранын түрк дүйнөсүнүн сыймыгына айланганын баса белгилеп, салттуу түрк спорт оюндарынын “Манас” университетинде өтүп жатканына кубанычта болгонун билдирди.
Түркиянын салттуу спорт федерациясынын ардактуу президенти, “Кыргыз-Түрк “Манас” университетинин ректору, профессор Алпаслан Жейлан: “Салттуу спорт оюндары улут катары кайрадан калыптануубуз үчүн чоң мүмкүнчүлүк берет. Улуттук маданиятты жашаткан эң маанилүү нерсе – адамдардын аны ээлик кылуусу жана жашатуусу. Салттуу спорт оюндарыбыз маданият менен спорттун кесилишкен жери, башкача айтканда, спорт менен машыгып жаткан учурда каада-салтыбызды да көрсөтөбүз. Симпозиум байыртадан келе жаткан каада-салттарыбызды келечек муунга өткөрүп берүүдө маанилүү платформалардын бири.”-деди.
Улуттук маданияттын өзөгү: салттуу спорт
Ректор, профессор Алпаслан Жейлан улуттук маданиятты жашаткан эң маанилүү нерсе – адамдардын аны ээлик кылуусу жана жашатуусу экенин баса белгиледи. Маданият жашабаса жоголорун, ошондуктан ар бир улут маданиятына ээлик кылуусу керектигин айтты. Ал эми спорттук иш-чаралар маданиятка ээлик кылуунун бир түрү экенин белгилеген ректор, профессор Алпаслан Жейлан түрк дүйнөсүндөгү бул оюндардын келечекке өткөрүлүп берүүсүндө илимий иштер эң маанилүү экендигин айтып, симпозиумду өткөрүүнүн максаты – түрк салттуу оюндарында өзгөчөлүк жаратуу жана келечек муунга өткөрүп берүү экенин билдирди. “Манас” университетинде салттуу спорт институтунун бар экенине сыймыктанарын кошумчалады.
Мындан тышкары ректор, профессор Алпаслан Жейлан түрк улутунун тамыры менен тыгыз байланышта болгон улут экенине көңүл буруп, түрк коомунун өздүгүнүн негизин маданият түзөрүн белгиледи.
Дүйнөлүк этноспорт конфедерациясынын төрагасына ыраазычылык билдиребиз
Ректор, профессор Алпаслан Жейлан 11-октябрь күнү “Түрк элдеринин салттуу спорт оюндарынын” XII Эл аралык симпозиумунун 12-13-октябрь күндөрү Түрк мамлекеттеринин уюму - Түрк университеттер биримдигинин салттуу оюндарын уюштурууга чоң салым кошкон Дүйнөлүк этноспорт конфедерациясынын төрагасы Нежмеддин Билал Эрдоган ыраазычылык билдирди.
“Ат – түрктүн канаты”, - деген ректор, сөзүн мындай улантты: профессор Алпаслан Жейлан түрк элинин биримдигине жана ынтымагына токтолуп, симпозиумдун катышуучуларына кайрылып: «Бирге өткөргөн бул маңыздуу убакыт келечекке таштала турган маанилүү кадамдардын башталышы болот деп ишенем. »
Симпозиумда КРнын Маданият, маалымат, спорт жана жаштар саясаты министринин орун басары, спорт жана дене тарбия департаментинин директору Айбек Абдымомунов мындай деди: “Дүйнөлүк өнүгүү процессинде батыш жана чыгыш маданиятын бириктирип келген көчмөн цивилизациясынын салттык оюндарынын тарыхы, эрежелери, мындан ары өнүктүрүү усулдары жөнүндө макала даярдап жаткан баяндамачылар менен көрүшкөнүмө абдан кубанычтамын”-деди. Дүйнөлүк этноспорт конфедерациясына жана “Манас” университетине ыраазычылык билдирип, мындай иш-чаралар түрк дүйнөсү менен башка маданияттар ортосундагы маданий байланышты бекемдей турганын билдирди.
Программанын соңунда симпозиумдун катышуучуларына ыраазычылык баракчалары тапшырылып, эстеликке сүрөткө түшүү менен аяктады.
ММК жана коомчулук менен байланыш бөлүмү
Haberin Fotoğrafları:
https://www.instagram.com/p/CySWsNuNmEE/?utm_source=ig_web_copy_link&igshid=MzRlODBiNWFlZA==
Haberin Videosu: