Жаңылыктар

Кыргыз-Түрк “Манас” университети түрк дүйнөсүдө академиялык кызматташтыкты бекемдеген маанилүү келишимге кол койду. КТМУнун ректору, профессор Алпаслан Жейлан менен Ататүрк университетинин ректору, профессор Ахмет Хажымүфтүоглу эки университеттин ортосунда билим берүү, илимий изилдөө жана академиялык өз ара аракеттенүүнү көздөгөн Академиялык кызматташуу келишимине кол коюшту.

Беш жылга жарактуу болгон бул келишим КТМУнун эл аралык деңгээлдеги концепциясынын алкагында академиялык тармактарды чыңдоону жана биргелешкен илимий өндүрүштү арттырууну көздөйт. Бул келишимдин негизги максаты — эки университеттин ортосунда өз ара ишенимге таянган, туруктуу жана пландуу институционалдык кызматташтык үчүн бекем негиз түзүү.

Билим берүү жана илимий изилдөөдө орток горизонт

Келишимдин алкагында биргелешкен билим берүү жана илимий иш-чараларды уюштуруу, окутуучулар менен студенттердин алмашуу программаларын ишке ашыруу, өзгөчө магистранттар менен докторанттар баштаган изилдөөчүлөрдүн орток долбоорлорго катышуусун колдоо каралууда. Ошондой эле семинарларды, академиялык жыйындарды, кыска мөөнөттүү академиялык иш-чараларды өткөрүү, басылмаларды, окуу-методикалык материалдарды жана маалымат алмашууну жүзөгө ашыруу кызматташтыктын негизги максаттарынын катарына кирет.

Студенттердин алмашуу программалары бир же эки семестрди же толук академиялык жылды камтыган түрдө пландалары, ал эми бул программалар эки университеттин академиялык жобо-эрежелерине ылайык жана жыл сайын түзүлүүчү өз ара макулдашуулар аркылуу ишке ашырылаары белгиленди.

“КТМУ — орток академиялык концепциянын алып жүрүүчүсү”

КТМУнун ректору, профессор Алпаслан Жейлан кол коюу аземинен кийин билдирүү жасап, бул келишим түрк дүйнөсүндөгү университеттер ортосундагы илимий интеграцияга олуттуу салым кошорун белгиледи.

Алпаслан Жейлан өз сөзүндө: «Ататүрк университети менен түзгөн бул кызматташтык — орток тарыхыбыз менен маданиятыбызды заманбап илимий өндүрүш менен айкалыштырган стратегиялык кадам. Келишим окутуучуларыбыз жана студенттерибиз үчүн жаңы мүмкүнчүлүктөрдү түзүп, эл аралык деңгээлдеги туруктуу академиялык байланыштарга жол ачат деп ишенем», — деди.

Ататүрк университетинин ректору, профессор Ахмет Хажымүфтүоглу өз билдирүүсүндө КТМУ менен түзүлгөн бул келишим эки мекеменин ортосундагы кызматташтык менен гана эмес, түрк дүйнөсүндө орток академиялык концепциянын чыңдалышына кызмат кыларын белгиледи.

Түзүлгөн келишим аркылуу Кыргыз-Түрк “Манас” университети түрк дүйнөсүндө билим өндүрүүгө, академиялык мобилдүүлүккө жана институттук тилектештикке басым жасаган эл аралык кызматташууларды чечкиндүү түрдө улантууну максат кылууда.