Жаз Жарчысы Нооруз Майрамы
2025-жылдын 20-мартында, бейшемби күнү, саат 15:00дө, Нооруз майрамынын тарыхый, маданий жана диний жактары боюнча уюштурулган панелдик талкуу КТМУнун Теология факультетинин Абу Ханифа амфисинде болуп өттү. Панелдин модератору м.а доцент Айтмамат Кариев болду. Ар кандай темалар боюнча баалуу баяндамалар жасалды.
Гаухар Асанбек кызы Нооруздун келип чыгуу тарыхын карап чыгып, бул майрамдын тамыры тереңге кетерин белгиледи. Жибек Кенжебек кызы Нооруз ар кайсы маданияттарда кандай белгиленерин баяндап, анын жалпы адамзат үчүн маанилүү майрам экенине токтолду. Айзирек Рахманова Нооруздун кыргыз салттарындагы ордун айтып берип, убакыттын өтүшү менен өзгөрүп турган үрп-адаттарга көңүл бурду. Кубанычбек Матраимов Нооруздун теологиялык жактарын изилдеп, ар түрдүү коомдордогу ишенимдер менен салттарды талдады.
Панелдин дагы бир маанилүү бөлүгү Нооруздун диний тарабы болду. Айтурган Авазбек Кызы бул майрамдын ислам фыкхындагы ордун талдап, анын руханий мааниси жөнүндө маанилүү маалыматтарды берди.
Панелдин соңунда модератор, м.а доцент Айтмамат Кариев, жалпы жыйынтык чыгарып, Нооруз майрамын мусулмандар белгилешине шарияттык жактан уруксат берилгендиги тууралуу кеңири түшүндүрмө берди. Бул иш-чара Нооруз майрамынын маңызын терең түшүнүүгө мүмкүнчүлүк түзүп, тынчтык, биримдик жана берекенин символу катары анын маданий мураска тиешелүү экендиги баса белгиленди. Катышуучулардын суроолоруна жооптор берилди.
Панелдин соңунда КТМУнун Теология факультетинин деканы, профессор доктор Хасан Айык баяндамачыларга ыраазычылык билдирип, катышуу сертификаттарын тапшырды.
