«Куран Каримди жаттоо ыкмалары» аттуу семинар өткөрүлдү
Факультетибиздин 2026-жылдагы социалдык жоопкерчилик иш-чараларынын алкагында 2026-жылдын 18-февралында айымдарга арналган «Куран Каримди жаттоо ыкмалары» аттуу семинар өткөрүлдү. Семинар КТМУнун Теология факультетинин кызматкери Жамила Жораева жана кыз студенттер тарабынан уюштурулду. Семинарда изилдөөчү-окутуучу Алтынай Курманбекова «Куран Каримди жаттоо ыкмалары» темасында баяндама жасады.
Семинарда Куран Каримди жаттоо ыкмалары салттуу кайталоо методдору менен гана чектелбестен, когнитивдик түзүмдөө жана мааниге негизделген окутуу ыкмалары менен да негизделиши керектиги белгиленди. Жаттоо процессинде үн чыгарып кайталоо, жазуу, угуу жана туруктуу бекемдөө ыкмалары көңүл буруу, мотивация жана эс тутумдун туруктуулугун камсыз кылган негизги факторлор экени баса көрсөтүлдү. Бул алкакта пландуу иштөө тартиби жана педагогикалык жетекчилик менен жүргүзүлгөн жаттоо иш-аракеттери туруктуу билим алуунун жана текст менен терең байланыш түзүүнүн маанилүү негизи катары бааланды.
Семинарга болжол менен 120 айым катышып, чоң кызыгуу менен угушту. Жооптуу тараптар бул программанын ар жуманын бейшемби күнү ошол эле убакытта улантыларын билдиришти.
