Жаңылыктар

Кыргыз-Түрк “Манас” университети тарабынан жүргүзүлүп жаткан «КТМУнун айылдарга жана мектептерге болгон сапарлары» аттуу социалдык жоопкерчилик долбоорунун алкагында түзүлгөн адистер тобу 2026-жылдын жазгы семестринде дагы өлкөнүн ар кайсы аймактарында талаа иштерин улантууда. Айылдардагы  билим берүү, тургундардын жана жаныбарлардын саламаттыгы, социалдык турмушта кездешкен көйгөйлөргө чечим табуу жана жарандарга  колдоо көрсөтүү максатында жүргүзүлгөн бул долбоорго дарыгерлер, окутуучулар, педагогдор, психологдор жана ветеринар дарыгерлер катышты.

Мурун да көптөгөн айыл жергелерине барып, кеңири талаа иштерин жүргүзгөн адистер тобу бул жолу жаңы түзүлгөн маршрут программасынын негизинде өлкөнүн ар башка аймактарындагы мектептерге жана айылдарга барышты. Профессор Кемал Полаттын жетекчилигиндеги КТМУнун Туруктуу өнүгүү комиссиясынын катышуусу менен өткөн эки күндүк сапарда Кеңеш айылындагы Жаныш Русенбеков орто мектеби, Буденовка айылындагы Үсөйүн Адиков орто мектеби, Дмитриевка айылындагы Ишеналы Арабаев орто мектеби, Нооруз айылындагы Шайкул Рахманов орто мектеби, Алмалуу айылындагы А. Сулайманов орто мектеби, Ысык-Ата районундагы Мурзалиев Арстанбек орто мектеби жана Каратай Булак айылындагы Осмонкул Бөлөбалаев орто мектебине барышып, окуучулар, мугалимдер жана айыл тургундары менен жолугушуулар өткөрүлдү.

Окуучуларга максат коюу жана келечегин пландаштыруу боюнча кеңештер берилди.

Педагогдор жана билим берүү тармагындагы окутуучулар окуучулар үчүн маалыматтык отурумдарды өткөрүштү. Программаларда багыт коюу, сабак окуудагы тартип, билим алуудагы мотивация, экзамендерге даярдык процесси, кесиптик багыт алуу жана жеке өнүгүү боюнча кеңештер берилди. Окуучулардын келечекке карата коюлган пландарына салым кошо турган сунуштар айтылды.

Психологиялык колдоо боюнча уюштурулган жолугушууларда окуучулардын өнүгүүсү жана мектептеги көйгөйлөргө чечим издөө аракеттери жүргүзүлдү.
Психологдор окуучулардын өзүнө ишенүү жөндөмүн, теңтуштар менен мамилесин, стрессти башкаруу жана баарлашуу көндүмдөрүн өнүктүрүү боюнча семинарларды өткөрүштү. Мугалимдер менен болгон жолугушууларда мектептеги жүрүм-турум көйгөйлөрү, окуучулардын психосоциалдык муктаждыктары жана аларды чечүү жолдору талкууланды.

Балдардын саламаттыгы жана аны алдын алуу боюнча маселелерге басым жасалды 

Саламаттык сактоо кызматкерлери окуучуларга жана айыл тургундарына жеке гигиена, ден-соолукту сактоо, жугуштуу оорулардан коргонуу жана алгачкы жардам тууралуу маалымат беришти. Айрыкча балдардын саламаттыгы жана алдын алуу кызматтарына байланыштуу түшүндүрүү иштерине басым жасалды.

Айыл чарба факультети айылда өндүрүштү көбөйтүү боюнча агрардык кеңештерди берди

Айыл чарба факультетинин окутуучулары айыл тургундары менен жолугушуп, натыйжалуу айыл чарба ыкмалары, топурактын түшүмдүүлүгү, өсүмдүк ооруларына каршы күрөшүү, суу ресурстарын натыйжалуу пайдалануу жана туруктуу өндүрүш ыкмалары боюнча маалымат берип, аймактык өндүрүштүн мүмкүнчүлүктөрүн арттырууга багытталган сунуштар менен бөлүштү.

Ветеринар дарыгерлер мал чарбачылык менен алектенген үй-бүлөлөргө колдоо көрсөтүп, маалымат беришти.

Ветеринар дарыгерлер чоң жана майда малды багуу, алдын алуучу эмдөө, жаныбар ооруларын эрте аныктоо жана гигиеналык шарттар боюнча маалымат беришти. Мал чарбачылык менен алектенген үй-бүлөлөрдүн суроолоруна жооп берип, практикалык кеңештерди сунушташты.

Теология факультети тарабынан социалдык ынтымак жана баалуулуктар тууралуу атайын иш-чаралар өткөрүлдү.

Теология факультетинин окутуучулары үй-бүлөлүк мамиле, коомдук биримдик, адеп-ахлактык баалуулуктар жана жаштардын социалдык өнүгүүсү боюнча маектешүүлөрдү өткөрүп, коомдук биримдикти чыңдаган баалуулуктардын маанисин баса белгилешти.

Мугалимдер менен тажрыйба алмашуу

Мугалимдер менен болгон жолугушууларда класстагы иш-аракеттер, окуучулардын окуудагы жетишкендиктерин арттырууга багытталган ыкмалар жана билим берүүдө кездешкен  заманбап көйгөйлөр талкууланды. Өз ара пикир алмашуу аркылуу мугалимдердин практикалык тажрыйбалары тууралуу маалымат алынып, чечимге багытталган сунуштар иштелип чыкты.