Эл аралык балдарды коргоо күнү КТМУда шаңдуу белгиленди
Кыргыз-Түрк “Манас” университетинин (КТМУ) Үзгүлтүксүз билим берүү борбору тарабынан 1-июнь – Эл аралык балдарды коргоо күнүнө арналган майрамдык иш-чара өткөрүлдү. “Оба” чай бакчасында уюштурулган программада Үзгүлтүксүз билим берүү борборунун Жайкы мектебинин окуучулары кызыктуу оюн-зоокторго, таанып-билүүчү жана чыгармачыл иш-чараларга катышып, майрамдык маанай тартуулаган өзгөчө күн өткөрүштү.
Иш-чарага КТМУнун ректору, профессор Алпаслан Жейлан, проректор, профессор Исмет Алтынташ, башкы катчы, доктор Фатих Рамазан Истанбуллугил, Үзгүлтүксүз билим берүү борборунун башчысы, профессор Южел Өксүз, административдик кызматкерлер жана жайкы лагерге жаңы кабыл алынган окуучулар катышты.
Программанын жүрүшүндө окуучулар менен жакындан баарлашкан ректор, профессор Алпаслан Жейлан балдардын Эл аралык балдарды коргоо күнүндөгү кубанычын бөлүштү. Иш-чаранын алкагында ар түрдүү оюндар, командалык мелдештер жана социалдык активдүүлүктөр уюштурулуп, балдар жаратылыш койнунда көңүл ачып, достору менен жагымдуу убакыт өткөрүү мүмкүнчүлүгүнө ээ болушту.
Иш-чарада сөз сүйлөгөн ректор, профессор Алпаслан Жейлан балдар коомдун эң баалуу байлыгы жана келечектин куруучулары экенин белгилеп, алардын ар тараптуу өнүгүүсүнүн маанилүүлүгүнө токтолду.
Жейлан: «Келечекти ишенип тапшыра турган балдарыбыздын илим, искусство, спорт жана маданий баалуулуктар менен тыгыз байланышта тарбияланышы өтө маанилүү. Билим берүү мекемелеринин милдети академиялык жетишкендиктерге гана багытталбастан, коомго пайдалуу, жоопкерчиликтүү жана өзүнө ишенген инсандарды тарбиялоо болуп саналат. Балдарыбыздын бактысы жана өнүгүүсү үчүн өткөрүлгөн ар бир иш-чара келечекке жасалган баалуу инвестиция болуп эсептелет. Алардын кубанычына жана толкундануусуна орток болуу биз үчүн чоң бакыт», – деди.
