“Манас” университетинин студенттери “Студенттик стартап” сынагында ийгиликке жетишти
КР Министрлер Кабинетинин Төрагасынын орун басары Эдил Байсалов, Билим берүү жана илим министринин орун басары Расул Абазбек уулу жана бир катар министрликтердин өкүлдөрүнүн онлайн/оффлайн форматта катышуусунда өткөн кеңешмеде Кыргыз Республикасынын Министрлер Кабинетине караштуу “Студенттик стартап” пилоттук программасын ишке ашырууну координациялоо боюнча кеңеш 8 стартап долбоорго каржылык колдоо көрсөтүү чечимин кабыл алды. Кыргыз-Түрк “Манас” университетинин студенттеринин “Basi - KG” стартап-долбоору да жеңишке жеткен университеттердин катарына кирип, 556 миң 300 сом мамлекеттик каржылоо алуу мүмкүнчүлүгүнө ээ болушту.
Сынакка жалпысынан 21 жогорку окуу жайдын жана 3 колледждин студенттеринен 158 билдирме келип түшкөн. Жыйынтыгында 8 стартап-долбоор финалга өткөн, алардын арасында КТМУнун студенттеринин энтомопатогендик козу карындын негизинде биоинсектицид өндүрүү технологиясын иштеп чыгуу боюнча “Basi - KG” стартап-долбоору да бар. Долбоор айыл чарба факультетинин өсүмдүктөрдү коргоо бөлүмүнөн профессор Тинатин Дөөлөткелдиеванын жетекчилигинде командасы менен бирге бул инновациялык долбоор олуттуу ийгиликтерге жетишти.
“Basi - KG” стартап-долбоору өсүмдүктөрдү коргоо магистратура программасынын студенти Элита Исмаилова, айыл чарба факультетинин өсүмдүктөрдү коргоо бөлүмүнүн 4-курсунун студенттери Айкөл Алтымышова, Адилет Жааншаев жана Аксаамай Улукбек кызы тарабынан ишке ашырылууда.
Студенттерибизди куттуктап, “Basi - KG” стартап-долбоорунун ишмердүүлүгүнө ийгилик каалайбыз!
ММК жана коомчулук менен байланыш бөлүмү
https://www.instagram.com/p/C1RqMzUNGDj/?utm_source=ig_web_copy_link&igsh=MjJkMmIyYzQxYw==