КТМУнун Чет тилдер жогорку мектебинде коомдук тилектештикти чыңдаган жарманке иш-чарасы өткөрүлдү
Кыргыз–Түрк "Манас" университетинин Чет тилдер жогорку мектеби тарабынан кайрымдуулук максатында азык-түлүк жарманкеси уюштурулду.
Социалдык иш-чаралар комиссиясынын координациясы менен өткөрүлгөн бул иш-чара академиялык жамаат ичинде тилектештик маданиятын бекемдөөнү максат кылган үлгүлүү демилге катары өзгөчөлөндү. Университеттин борбордук кампусунда өткөн иш-чарага Сомали Республикасынын Анкара жана Бишкектеги элчиси Фатхудин Али Мохамед жана анын коштоосундагы делегация, КТМУнун ректору, профессор Алпаслан Жейлан, башкы катчы, доктор Фатих Рамазан Истанбуллугил, Чет тилдер жогорку мектебинин директору Эрдал Айдогмуш жана көптөгөн коноктор катышты.
Жарманкеде түрк жана кыргыз улуттук ашканасына таандык салттуу тамак-аштар академиялык жана административдик кызматкерлер менен алардын үй-бүлөлөрүнүн ыктыярдуу катышуусу аркылуу даярдалып, сунушталды. "Манас" университетинин коомдук жоопкерчиликке багытталган мамилесинин айкын мисалы болгон бул иш-чарадан түшкөн каражат жардамга муктаж студенттер үчүн социалдык колдоо иш-чараларына жумшалары белгиленди.
«Биз бир гана билим берген эмес, баалуулук жараткан университетпиз»
Бул сыяктуу иш-чаралар университеттин инсандыкка багытталган мамилесинин жана коомдук жоопкерчилик түшүнүгүнүн эң көрүнүктүү мисалдарынын бири экенин белгилеген ректор, профессор Алпаслан Жейлан: "Академиялык жана административдик кызматкерлерибиздин студенттер менен бирге ыктыярдуу негизде көрсөткөн аракеттери корпоративдик биримдикти гана эмес, социалдык сезимталдыкты да күчөтөт. Тилектештик маданиятын өнүктүргөн мындай демилгелер студенттерибиздин академиялык жана инсандык өнүгүүсүнө чоң салым кошот деп ишенебиз. Университет катары коомго пайда алып келген жана жалпы баалуулуктарды бекемдеген мындай иш-чараларды колдоп, биз бир гана билим берген эмес, баалуулук жараткан университет болууну улантабыз", — деп белгиледи.
