Кыргыз-Түрк кол өнөрчүлүгү: “Өтмүштүн даңазасын келечекке өткөрүп берүү” көргөзмөсү
“Манас” университетинин чамгарагында кыргыз жана түрк маданияттарын жолуктурган маңыздуу көргөзмө болуп өттү.
КТМУ, Ankara Olgunlaşma Enstitüsü жана “Аталар изи” коомдук фонду биргеликте уюштурган “Өтмүштүн даңазасын келечекке өткөрүп берүү” аталышындагы кыргыз-түрк кол өнөрчүлүк көргөзмөсү үстүбүздөгү жылдын 4-6-ноябрь күндөрү “Манас” университетинин ректорлуктагы фойесинде искусство сүйүүчүлөрү менен жолугушту.
Бул уникалдуу иш-чара эки өлкөнүн тамыры терең кол өнөрчүлүгүн жана бай маданий мурастарын жаңы муундарга өткөрүп берүү менен катышуучулардын кызыгуусун арттырды.
Кыргыз-Түрк “Манас” университетинин гуманитардык факультетинин тарых бөлүмүнүн ага окутуучусу, PhD., профессор Незахат Жейландын координаторлугунда уюштурулган жана КТМУнун Камкорчулар кеңешинин төрагасы, PhD., профессор Ибрахим Чапак менен ректор, PhD., профессор Алпаслан Жейлан тарабынан ачылган көргөзмөгө проректор, PhD., профессор Режаи Доган, ректордун кенешчиси, PhD., профессор Кемал Полат, Ankara Olgunlaşma Enstitüsü төрайымы Ахсен Хыдыроглу, “Аталар изи” коомдук фондунун негиздөөчүсү Асел Калканова, көркөм өнөр факультетинин ага окутуучусу Бурул Мамбетова, коноктор катышты.
Кол өнөрчүлүк көргөзмөсү менен маданий мураска басым жасоо
Көргөзмөнүн ачылышында “Манас” телеканалына берген маегинде PhD., профессор Незахат Жейлан президент Режеп Таййип Эрдоган жана анын жубайы Эмине Эрдогандын Бишкекте болушуна кубангандыгын билдирди. Түрк мамлекеттер уюмунун 11-саммитине карата бүткүл түрк дүйнөсүнүн жетекчилеринин Бишкекте жолугушуусу алар үчүн чоң сыймык экенин белгиледи.
PhD., профессор Незахат Жейлан өз сөзүндө өткөрүлүп жаткан көргөзмөдө маданий мурасты сактоо жана аны келечек муундарга өткөрүп берүүнүн маанилүүлүгүн белгилеп, “Бул көргөзмөнү уюштуруудагы максатыбыз - 1995-жылы кыргыз-түрк кызматташтыгынан улам негизделген окуу жайыбыздын маданий жактан биримдикти чагылдыруусу болуп эсептелет. Буга байланыштуу университетке Ankara Olgunlaşma Enstitüsü тарабынан даярдалган кол өнөрчүлүк буюмдары алынып келинди. Мындан тышкары, көргөзмөгө кыргыз айымдары жасаган жергиликтүү кол өнөрчүлүк буюмдары коюлду”, - деди.
“Манас” университетинде кыргыз-түрк маданий баалуулуктарын бөлүшүп, катышуучуларды биримдикке чакырууну каалаганын билдирген PhD., профессор Незахат Жейлан бул маанилүү иш-чарага салым кошкондордун баарына ыраазычылык билдирди.
Көргөзмөдө кыргыздын салттуу кол өнөрчүлүгү көз жоосун алды
КТМУнун көркөм өнөр факультетинин ага окутуучусу Бурул Мамбетова жана анын шакирттери Кыргызстандын үрп-адаттарын чагылдырган атайын көргөзмө даярдашты. Көргөзмөгө кыргыздын кийимдери, токулган килемдер жана башка салттуу кол өнөрчүлүк буюмдары коюлду. Бул эмгектер кыргыз маданияты менен жакындан таанышууну каалаган конокторго кызыгуу жаратты.
Мындан тышкары, көргөзмөдө “Аталар изи” коомдук фондунун негиздөөчүсү жана кыргыз саймасынын чебери Асел Калканова кыргыз маданиятын чагылдырган улуттук кийимдерди, аксессуарларды тартуулады. Калканова катышуучуларга Кыргызстандын маданий баалуулуктары тууралуу айтып берип, салттуу кийимдерге чач учтук, жоолук, кеп такыя, элечек, тумар чач, калпак, курак, чыптама жана шамалбак сыяктуу кыргыздын улуттук кийимдери, баалуулуктары тууралуу маалымат берди.
Сайма көргөзмөсү
Ankara Olgunlaşma Enstitüsü төрайымы Ахсен Хыдыроглу Кыргызстанга жана “Манас“ университетине келгенине кубанычта экенин билдирди. Ал сайма көргөзмөсүнүн XVIII-XIX кылымдарга таандык чет өлкөлөрдөн алынып келинген үлгүлөрдү камтыганын белгилеп, “Ankara Olgunlaşma Enstitüsü цехтеринде даярдалган оригиналдуу дизайндар жана кылдат кол өнөрчүлүк менен жасалган салттуу буюмдар көргөзмө стенддеринде конокторго тартууланды”, - деди.
Көргөзмөдө француз зыгыр кездемелерине саймаланган түрк кол өнөрчүлүгүнүн ыкмасында жасалган дизайндар көрсөтүлсө, “өдемиш” жибек жип менен саймаланган салттуу кол өнөрчүлүк да көпчүлүктүн көңүлүн бурду. XVII кылымга таандык кол менен боелгон, оймо-чиймелер менен саймаланган туш кийиз да көргөзмөнүн эң көрүнүктүү экспонаттарынын бири болду.
Бул эмгектер түрк маданиятынын мыкты кол өнөрчүлүгү менен айкалышкан салттуу жана заманбап стилде көргөзмөгө келгендерге тартууланды.
“Өтмүштүн даңазасын келечекке өткөрүп берүү” көргөзмөсү кыргыз жана түрк элдеринин маданий баалуулуктарын сактоонун маанилүүлүгүн дагы бир жолу баса белгиледи. Көргөзмө кол өнөрчүлүктү жайылтуудан тышкары, бул баалуу салттарды сактап калуу жана келечек муундарга өткөрүп берүү максатында маданий элчи милдетине айланды.
Иш-чарада кыргыз жана түрк кол өнөрчүлөрү жараткан көз жоосун алган эмгектер көрсөтүлүп, эки өлкөнүн орток маданий мурастарын камтыган бекем байланыш түзүлдү. Салттуу искусствону келечек муундарга өткөрүп берүү үчүн көпүрө болгон көргөзмө кыргыз жана түрк бай маданияттарын жолуктуруп, катышуучуларга терең маданий тажрыйба тартуулады.
Haberin Fotoğrafları:
https://www.instagram.com/p/DCD9iCwNeKc/?igsh=YmFlZWZ2Y3VleTY5
Instagram:
https://www.instagram.com/reel/DCD8OxjNteH/?igsh=OThwd2h3ZzdjMG5n
Manas TV'nin Haberi:
